Azərbaycan Qida Təhlükəsizliyi İnstitutu (AQTİ) ölkədə fəaliyyət göstərən laboratoriyaların texniki səriştəliliyinin obyektiv qiymətləndirilməsi və ölçmə nəticələrinin qarşılıqlı uyğunluğunun təmin edilməsi məqsədilə növbəti səriştəlilik sınağını elan edir.
Bu barədə Aztibb.az-a AQTİ-dən məlumat verilib.
Bu dəfə keçiriləcək səriştəlilik sınağı suda xlorid, hidrokarbonat və sulfat ionlarının kəmiyyətcə təyini üzrə təşkil olunacaq. Səriştəlilik sınaqları ISO 17043:2023 “Uyğunluğun qiymətləndirilməsi – Səriştəlilik sınaqlarına ümumi tələblər” beynəlxalq standartının tələbləri əsasında təşkil edilir.
Sınaqda iştirak etmək istəyən laboratoriyalar 31 avqust 2026-cı il tarixinədək müraciət edə bilərlər. İştirak etmək üçün laboratoriyalar “Müraciət forması”nı dolduraraq info.pt@afsa.gov.az elektron poçt ünvanına göndərməlidirlər.
Azərbaycan Qida Təhlükəsizliyi İnstitutu bütün aidiyyəti laboratoriyaları səriştəlilik sınaqlarında fəal iştirak etməyə dəvət edir.
