Azərbaycan Respublikası Dövlət Gömrük Komitəsi Tibbi Xidmət İdarəsinin Bio-Etika Komissiyasının növbəti iclası keçirilib.

Mərkəzi Gömrük Hospitalından Aztibb.az-a verilən xəbərə görə, iclasda müəssisənin Ümumi cərrahiyyə şöbəsinin həkimi, t.e.d. Aynur Səfiyevanın Hospitalın bazasında klinik tədqiqat keçirilməsi ilə bağlı müraciətinə baxılıb.

Tədqiqat haqqında məlumat verən A.Səfiyeva bildirib ki, “Kolonoskopiya kolorektal poliplərin diaqnostika və müalicəsində əsas amil kimi” tədqiqatı retrospektiv olaraq beş il ərzində Mərkəzi Gömrük Hospitalında həyata keçirilmiş kolonoskopiya prosedurlarının nəticələrinin təhlilinə, kolorektal poliplərin aşkarlanması və müalicəsində kolonoskopiyanın diaqnostik və terapevtik əhəmiyyətinin qiymətləndirilməsinə həsr olunub.

İclasın gedişində A.Səfiyeva Komissiya üzvlərinin suallarını cavablandırıb. Bio-Etika Komissiyasının üzvləri müzakirə edilən tədqiqatın nəticələrinin kolonoskopiyanın dəqiq və hərtərəfli tətbiqinin əhəmiyyəti və kolorektal xərçəng riskini azaltması ilə bağlı mövcud bilikləri zənginləşdirəcəyini qeyd edərək, Mərkəzi Gömrük Hospitalı bazasında aparılacaq “Kolonoskopiya kolorektal poliplərin diaqnostika və müalicəsində əsas amil kimi” tədqiqatının etik standartlara cavab verdiyini təsdiq ediblər.

Daha sonra iclasda Hospital həkimlərinin elmi maraq sahələrinin və potensial klinik tədqiqat mövzularının müəyyən edilməsi, onların beynəlxalq elmi araşdırmalarda iştirakının təşviq edilməsi, xüsusilə də gənc həkimlərin və rezidentlərin elmi tədqiqatlara cəlb edilməsi ilə bağlı məsələlər ətraflı müzakirə olunub.