ATU-nun Travmatologiya və Ortopediya kafedrasının assistenti, Tədris Cərrahiyyə Klinikasının travmatoloq-ortoped cərrahı İsmixan Mətiyev tərəfindən 70 yaşlı pasiyent üzərində uğurlu total diz oynağının endoprotezləşdirilməsi (total diz artroplastikası) əməliyyatı həyata keçirilib.
Klinikadan Aztibb.az-a verilən məlumata görə, pasiyent 6 il əvvəl tərəfimizdən icra olunan sol diz oynağında aparılmış endoprotezləşdirmə əməliyyatından uğurlu nəticə əldə edib. Rentgenoloji müayinələrdə həmin protezin normal vəziyyətdə olduğu müşahidə edilir. Son dövrlərdə isə sağ diz oynağında deformasiyalaşdırıcı osteoartrozun irəliləməsi, güclü ağrı və hərəkət məhdudiyyəti səbəbindən yenidən Tədris Cərrahiyyə Klinikasına müraciət edib.
Əməliyyat orta hesabla 1 saat davam edib, cərrahi müdaxilə zamanı diz oynağı açılaraq artroz nəticəsində zədələnmiş qığırdaq toxuması və oynaq səthləri xaric edilib, onların yerinə müasir diz endoprotezi implantasiya olunub.
Total diz artroplastikasının əsas məqsədi ağrının aradan qaldırılması, diz oynağının funksiyasının və hərəkət həcminin bərpası, həmçinin pasiyentin gündəlik həyat keyfiyyətinin yüksəldilməsidir.
