Vaxt azlığı bir çox insanın müntəzəm idman etməsinə mane olur. Lakin yeni araşdırma göstərir ki, həftədə cəmi bir uzunmüddətli intensiv məşq də faydalı ola bilər.

Aztibb.az "Nature Communications" jurnalında dərc olunan məqaləyə istinadən yazır ki, Honq Konq Universitetinin alimlərinin araşdırmasına görə, həftədə bir dəfə 75 dəqiqəlik interval məşqi edən insanlarda qarın piyinin azalması həftədə üç dəfə daha qısa məşq edənlərlə demək olar ki, eyni olub.

Tədqiqatda qarın nahiyəsində artıq piy toplanmış 315 nəfər iştirak edib. Onların orta yaşı 48 olub və iştirakçıların əksəriyyəti qadınlar idi. Bütün iştirakçılar əvvəlcədən oturaq həyat tərzi keçirirdilər.

İştirakçılar üç qrupa bölünüb: bir qrup həftədə bir dəfə 75 dəqiqə, digər qrup isə eyni ümumi müddəti həftədə üç məşqə bölərək idman edib. Üçüncü qrup isə yalnız sağlam həyat tərzi ilə bağlı maarifləndirici görüşlərdə iştirak edib.

Alimlər bildirirlər ki, qarın piyinin çoxluğu ürək-damar xəstəlikləri, şəkərli diabet və erkən ölüm riskini artırır. Əvvəlki tədqiqatlar göstərib ki, bel çevrəsinin hər 10 santimetr artması erkən ölüm riskini 11 faiz yüksəldir.

Müəlliflərin fikrincə, nəticələr göstərir ki, vaxtı məhdud olan insanlar da həftəlik tövsiyə olunan fiziki aktivliyi bir günə toplamaqla sağlamlıqlarına müsbət təsir göstərə bilərlər.