Ölkədə həşəratların çoxalma ocaqlarının müəyyən edilməsi məqsədilə mütəmadi monitorinqlər aparılır. Zərurət yaranan ərazilərdə dezinseksiya, dezinseksiya tədbirləri həyata keçirilir. Durğun su mənbələrinin ləğv edilməsi, tullantıların vaxtında daşınması, ərazilərin sanitariya vəziyyətinin yaxşılaşdırılması həşəratların sayının azalmasına mühüm təsir göstərir.

Bu barədə Aztibb.az-a Respublika Gigiyena və Epidemiologiya Mərkəzindən (RGEM) xəbər verilib.

Eyni zamanda bildirilib ki, yay mövsümündə müşahidə edilən yüksək temperaturun və yağıntıların miqdarındakı dəyişikliklərin həşəratların, xüsusilə də ağcaqanadların, milçəklərin və bəzi digər növlərin aktivliyinə təsir göstərməsi mümkündür. Bununla əlaqədar olaraq, daxil olan bütün müraciətlər də operativ şəkildə araşdırılır, aidiyyəti qurumlara yönləndirilir. Vətəndaşlara fərdi qoruma tədbirlərinin görülməsi tövsiyə edilir.

“Ayrı-ayrı bölgələrdə iqlim və ekoloji şəraitdən asılı olaraq bəzi həşərat növlərinin sayında mövsümi dəyişikliklər müşahidə oluna bilər. Ağcaqanad, gənə və digər həşəratlardan qorunmaq üçün repelentlərdən istifadə etmək, uzunqol və açıq rəngli geyimlər geyinmək, pəncərələrdə torlardan istifadə etmək, durğun suyun toplanmasına yol verməmək və təbiətdə olduqdan sonra bədəni gənələrə qarşı yoxlamaq tövsiyə olunur”, - deyə məlumatda vurğulanıb.

Həmçinin diqqətə çatdırılıb ki, hazırda Azərbaycanda ağcaqanadlar vasitəsilə yayılan infeksiyalarla bağlı epidemioloji vəziyyət sabitdir.