TƏBİB-in tabeliyində fəaliyyət göstərən Tərtər Rayon Mərkəzi Xəstəxanasının Ağdərə rayonu Vəngli tibb məntəqəsində əhalinin sağlamlığının qorunması və tibbi xidmətlərə əlçatanlığının artırılması məqsədilə səyyar tibbi aksiya təşkil olunub.

Bu barədə Aztibb.az-a Tərtər RMX-dan bildirilib.

İşğaldan azad olunmuş ərazilərdə əhaliyə göstərilən tibbi xidmətlərin keyfiyyətinin yüksəldilməsi, pasiyentyönümlü səhiyyə xidmətlərinin əlçatanlığının artırılması və vətəndaşların yaşadıqları ərazidə müasir tibbi xidmətlə təmin olunması TƏBİB-in əsas prioritet istiqamətlərindəndir. Bu məqsədlə həyata keçirilən səyyar tibbi müayinələr mövcud sağlamlıq vəziyyətinin qiymətləndirilməsinə, xəstəliklərin erkən aşkarlanmasına, vaxtında tibbi müdaxilənin təmin edilməsinə və gələcəkdə göstərilən səhiyyə xidmətləri daha da təkmilləşdirilməsinə mühüm töhfə verir.

Müayinə çərçivəsində terapevt, ginekoloq, pediatr, cərrah, kardioloq və laboratoriya ixtisasları üzrə həkimlər tərəfindən vətəndaşlara tibbi xidmət göstərilib. Müraciət edən şəxslərin sağlamlıq vəziyyəti qiymətləndirilib, şikayətləri dinlənilib, laborator analizlər üçün nümunələr götürülüb və zəruri müayinələr aparılıb.

Səyyar tibbi aksiya zamanı 21-dən çox vətəndaşa ümumilikdə 50-yə yaxın tibbi xidmət göstərilib.