ATU-nun Tədris Cərrahiyyə Klinikasının Transplantologiya şöbəsinin müdiri, ATU-nun I cərrahi xəstəliklər kafedrasının assistenti Anar Namazov tərəfindən uzun illərdir qasıq yırtığından əziyyət çəkən xəstə üzərində uğurlu laparoskopik cərrahi əməliyyat icra olunub.

Klinikadan Aztibb.az-a bildirilib ki, xəstənin anamnezinə əsasən, soltərəfli qasıq yırtığı 30 ildən artıq müddətdə mövcud olub. Uzunmüddətli yırtıq zaman keçdikcə ölçüsünün böyüməsi, narahatlıq hissi və ağırlaşma riskinin artması ilə müşayiət olunduğundan cərrahi müdaxilə qərara alınıb.

Əməliyyat zamanı müasir minimal invaziv cərrahiyyənin geniş tətbiq olunan üsullarından biri olan TAPP (Transabdominal Preperitoneal) texnikasından istifadə edilib. Bu metod qarın boşluğu vasitəsilə yırtıq nahiyəsinə təhlükəsiz şəkildə çatmağa, yırtıq kisəsinin işlənməsinə və qüsurun etibarlı şəkildə bərpasına imkan verir.

Yırtıq qapısının möhkəmləndirilməsi məqsədilə anatomik quruluşa uyğun xüsusi anatomik tor (mesh) implantasiya olunub. Mesh istifadəsi qarın divarının möhkəmliyini bərpa etməklə yanaşı, gələcəkdə yırtığın təkrarlanma ehtimalını əhəmiyyətli dərəcədə azaldır.

Laparoskopik yanaşmanın üstünlükləri sayəsində əməliyyat kiçik kəsiklərlə həyata keçirilib. Bu isə əməliyyatdan sonrakı ağrıların minimuma enməsinə, infeksiya riskinin azalmasına, xəstənin erkən mobilizasiyasına və qısa müddətdə gündəlik həyatına qayıtmasına şərait yaradır.

Tədris Cərrahiyyə Klinikasında qasıq yırtıqlarının müalicəsində beynəlxalq klinik protokollara uyğun müasir laparoskopik texnologiyaların tətbiqi davam etdirilir və xəstələrə yüksək səviyyəli, təhlükəsiz cərrahi xidmət göstərilir.