Körpənin dünyaya gəlişi hər bir ailə üçün ən böyük sevincdir. Lakin bu sevinc həm də böyük məsuliyyət rəmzidir.

Aztibb.az-ın xəbərinə görə, yenidoğulmuşlara həkim-neonatoloqların reanimasyon və pediatrik müayinələri aparıldıqdan sonra körpələrin həyatının ilk 12 saatında mühüm mərhələlər yaşanır ki, bu da ilkin peyvəndlərin gələcək sağlamlığa təsiri üçün çox önəmlidir.

Körpə doğulduqdan dərhal sonra və ilk 12 saat ərzində pediatr-neonatoloqlar tərəfindən hərtərəfli müayinə olunur. Bu müayinə zamanı körpənin refleksləri, tənəffüsü, ürək döyüntüləri və ümumi fiziki vəziyyəti yoxlanılır.

İlk 12 saat həm də peyvənd təqviminun ən kritik dövrüdür. Ümumdünya Səhiyyə Təşkilatının (ÜST) tövsiyələrinə uyğun olaraq, xəstəxanamızda doğulan hər bir körpəyə ilk 12 saat ərzində hepatit B və vərəm (BCG) əleyhinə ilkin peyvəndlər vurulur. Bu, körpənin immun sisteminin xarici aləmlə ilk təhlükəsiz qarşılaşmasıdır.

Peyvəndlərin vaxtında vurulması gələcəkdə fərdin sağlam böyüməsinə birbaşa təsir edir. İlk saatlarda vurulan peyvənd körpəni ömürlük əlillikdən, xroniki qaraciyər xəstəliklərindən və vaxtsız ölüm riskindən qoruyur. İmmunitet qoruyucu qalxan rolunu oynayaraq uşağı infeksiyalara qarşı dözümlü edir.