Bakı şəhəri, Xətai rayonu üzrə Bakı Baş Səhiyyə Mərkəzinin strukturuna daxil olan 11 tibb müəssisəsinin qeydiyyatçıları və həkimləri üçün MEDO proqramının tətbiqinə dair təlim keçirilib.

Mərkəzdən Aztibb.az-a bildirilib ki, təlim TƏBİB-in Sığorta işinin təşkili şöbəsinin böyük məsləhətçisi Nigar Aslanova, həmin şöbənin məsləhətçisi Ruqayyə Sultanlı, TƏBİB-in tabeliyində fəaliyyət göstərən “Rəqəmsal Tibbi Həllər” MMC-nin əməkdaşı Emil Səlimov tərəfindən keçirilib.

Məqsəd tibb işçilərinin MEDO proqramından istifadə bacarıqlarının artırılması və rəqəmsal idarəetmə proseslərinin təkmilləşdirilməsi olub.

İştirakçılara proqramın funksional imkanları, istifadəçi səlahiyyətlərinin idarə olunması və informasiya təhlükəsizliyi tələbləri barədə ətraflı məlumat verilib, həmçinin sistemin praktik istifadəsi nümayiş etdirilib, gündəlik fəaliyyət zamanı yarana biləcək məsələlər izah olunub.

Qeyd olunub ki, MEDO proqramının tətbiqi tibb müəssisələrində idaretmənin operativ və səmərəli təşkili, kağız daşıyıcılardan istifadənin azaldılması, idarəetmədə hesabatlılığın gücləndirilməsi, eləcə də iş proseslərinin optimallaşdırılması baxımından mühüm əhəmiyyət daşıyır.

Sonda iştirakçıları maraqlandıran suallar cavablandırılıb, proqramdan istifadəyə dair metodiki tövsiyələr təqdim olunub.