Təbiətdə 20–30 dəqiqə vaxt keçirmək kortizol hormonunun səviyyəsinin azalmasına və zehni yüklənmədən sonra diqqətin bərpasına kömək edə bilər. Bunun üçün şəhərdən kənara getmək mütləq deyil, insanın telefondan uzaqlaşıb ətrafdakı səslərə, qoxulara və təbiətin vizual detallarına diqqət yetirə biləcəyi park və ya digər yaşıllıq əraziləri də kifayətdir.

Aztibb.az "Medical Xpress" jurnalında dərc olunan məlumata diqqət çəkib.

Təbiətdə ən azı 20 dəqiqə vaxt keçirmək tövsiyəsinin əsaslarından biri Miçiqan Universitetinin apardığı araşdırmadır. Tədqiqatda şəhərdə yaşayan 36 nəfər iştirak edib. Onlardan səkkiz həftə ərzində həftədə ən azı üç dəfə 10 dəqiqə və ya daha çox müddət ərzində təbiətdə olmaları xahiş olunub. Alimlər bu seanslardan əvvəl və sonra iştirakçıların tüpürcəyində kortizol və alfa-amilaza səviyyələrini ölçüblər.

Tədqiqatçılar müəyyən ediblər ki, sərf olunan vaxta nisbətən kortizol səviyyəsinin ən nəzərəçarpan azalması təbiətdə 20–30 dəqiqə vaxt keçirildikdən sonra müşahidə olunub. Lakin araşdırma kiçik miqyaslı olub və təsadüfi seçilmiş klinik sınaq xarakteri daşımayıb. Buna görə də nəticələr universal tibbi tövsiyə kimi qəbul edilə bilməz.

Digər bir araşdırmada isə İngiltərədə yaşayan 19,8 min nəfərin məlumatları təhlil edilib. Nəticələr göstərib ki, həftə ərzində ən azı 120 dəqiqə təbiətdə vaxt keçirən insanlarda özünü yaxşı hiss etmə və sağlamlıq vəziyyətini daha yüksək qiymətləndirmə halları daha çox müşahidə olunub.

Alimlər qeyd ediblər ki, bu müddətin bir uzun gəzinti şəklində, yoxsa bir neçə qısa gəzintiyə bölünməsi əhəmiyyətli olmayıb. Bununla belə, tədqiqat yalnız təbiətdə vaxt keçirmə ilə sağlamlıq göstəriciləri arasında əlaqəni göstərib və məhz təbiətdə olmağın bu fərqlərə səbəb olduğunu sübut etməyib.