Alimlərin apardığı yeni araşdırma genetik dəyişdirilmiş CAR-T hüceyrə terapiyasının ağır sistemli qırmızı qurd eşənəyi (lupus) xəstəliyindən əziyyət çəkən bəzi xəstələrdə müsbət nəticələr verib.

Aztibb.az xarici mətbuata istinadla bildirir ki, tədqiqatın nəticələrinə əsasən, bu müalicə üsulu xəstənin öz immun hüceyrələrinin xüsusi şəkildə dəyişdirilərək yenidən orqanizmə yeridilməsi prinsipinə əsaslanır. Məqsəd immun sisteminin xəstəliyin yaranmasında rol oynayan hüceyrələrini hədəfə almaq və onun normal fəaliyyətini bərpa etməyə kömək etməkdir.

Araşdırmada iştirak edən bəzi xəstələrdə xəstəliyin əsas əlamətlərinin zəiflədiyi və uzunmüddətli remissiya (xəstəlik əlamətlərinin azalması və ya müvəqqəti aradan qalxması) müşahidə edildiyi qeyd olunub. Alimlərin fikrincə, bu nəticələr qurd eşənəyi kimi ağır autoimmun xəstəliklərin müalicəsində yeni istiqamət aça bilər.

Mütəxəssislər bildirirlər ki, hazırda autoimmun xəstəliklərin müalicəsində əsasən immun sisteminin həddindən artıq aktivliyini azaltmağa yönəlmiş preparatlardan istifadə olunur. Yeni hüceyrə terapiyaları isə xəstəliyin yaranma mexanizminə daha məqsədyönlü təsir göstərmək imkanları ilə diqqət çəkir.

Bununla yanaşı, alimlər vurğulayırlar ki, CAR-T terapiyasının geniş tibbi praktikada tətbiqi üçün əlavə və daha genişmiqyaslı klinik sınaqların aparılması vacibdir.