Təxminən 2 metr hündürlükdən yıxılması nəticəsində hər iki yuxarı ətrafından ciddi xəsarətlər alan pasiyent Mərkəzi Gömrük Hospitalının Travmatologiya və Ortopediya şöbəsinə müraciət edib. Aparılan operativ diaqnostik müayinələrdən sonra pasiyentin vəziyyəti dəqiq qiymətləndirilib və peşəkar cərrahi müdaxilə sayəsində uğurlu əməliyyat həyata keçirilib.

Aztibb.az-a verilən məlumata görə, Mərkəzi Gömrük Hospitalının Travmatologiya və Ortopediya şöbəsinin travmatoloqu Müseyib Əhmədov Səhiyyə TV-nin “Xəbər” proqramına müsahibəsində pasiyentin xəstəxanaya müraciət etdiyi andan etibarən göstərilən tibbi yardım, aparılan cərrahi əməliyyat və sonrakı bərpa prosesi barədə ətraflı məlumat verib.

Müseyib Əhmədov bildirib ki, hündürlükdən yıxılmalar zamanı ilk dəqiqələrdə düzgün davranış və zərərçəkənin vaxt itirmədən ixtisaslaşmış tibb müəssisəsinə çatdırılması ağır fəsadların qarşısının alınmasında həlledici əhəmiyyət daşıyır. Onun sözlərinə görə, vaxtında aparılan diaqnostika və müasir cərrahi yanaşmalar belə mürəkkəb travmaların uğurlu müalicəsində əsas amillərdəndir.