52 yaşlı qadın xəstə sol qalça çuxuru nahiyəsində ağrı və yüksək hərarət şikayətləri ilə ATU-nun Tədris Cərrahiyyə Klinikasına müraciət edib.

Klinikadan Aztibb.az-a bildirilib ki, xəstənin anamnezindən məlum olub ki, 4 il əvvəl açıq üsulla xolesistektomiya əməliyyatı keçirib. Əməliyyatdan iki il sonra onda davamlı diareya yaranıb və bu səbəbdən müxtəlif müayinə və müalicələr alıb. Təxminən bir il əvvəl isə xəstə vaginoplastika əməliyyatı keçirib.

Tədris Cərrahiyyə Klinikasının Transplantologiya şöbəsinin müdiri ATU-nun I cərrahi xəstəliklər kafedrasının assistenti Anar Namazov bildirib ki, son iki həftə ərzində ağrıların kəskinləşməsi və yüksək hərarətin müşahidə olunması səbəbindən xəstəyə oral və venadaxili kontrast maddə ilə tam qarın kompüter tomoqrafiyası (KT) müayinəsi aparılıb. Müayinə zamanı sol qalça çuxuru nahiyəsində infiltrativ toxumanın mərkəzində abses və yad cisim aşkarlanıb.

Diaqnozun dəqiqləşdirilməsi məqsədilə xəstə üzərində diaqnostik laparoskopiya icra olunub. Əməliyyat zamanı infiltrativ nahiyənin qarının ön divarına sıx bitişdiyi müəyyən edilib. Texniki baxımdan mürəkkəb şəkildə ayrılan toxuma geniş sərhədlər daxilində rezeksiya olunub.

Əməliyyatın növbəti mərhələsində aparılan diqqətli təftiş zamanı abses boşluğunun mərkəzində KT müayinəsində görünən yad cisim – diş çöpü (kürdan) aşkarlanaraq xaric edilib. Beləliklə, uzun müddət müxtəlif şikayətlərə səbəb olan nadir klinik hal uğurla aradan qaldırılıb.