Tələbələr xəstələrə tikiş qoymağa başlamazdan əvvəl cərrahi tikiş texnikasını təhlükəsiz şəraitdə inkişaf etdirmək üçün müxtəlif məşq üsullarından istifadə edirlər.

Aztibb.az "Nauka uspexa" nəşrində dərc edilən məqalədən bir hissəni təqdim edir.

Məqalədə qeyd edilir ki, bu məqsədlə ən çox seçilən vasitələrdən biri də üzümdür.

Üzümün nazik və zərif qabığı insan dərisinə müəyyən qədər bənzər xüsusiyyətlərə malik olduğundan, gələcək həkimlər tikişlərin dəqiq və səliqəli qoyulmasını, iynənin düzgün istiqamətləndirilməsini, əl hərəkətlərinin koordinasiyasını və hər bir ilmənin bərabər məsafədə atılmasını məşq edə bilirlər. Bu sadə, lakin effektiv metod onlara əl çevikliyi, dəqiqlik və inam qazandıraraq real klinik praktikaya daha yaxşı hazırlaşmağa kömək edir.

Belə təlimlər səhvlərin xəstələr üzərində deyil, təhlükəsiz məşq mühitində aradan qaldırılmasına imkan verir və cərrahi bacarıqların mərhələli şəkildə formalaşmasına şərait yaradır. Mütəxəssislər hesab edirlər ki, uğurlu cərrahın əsas üstünlüklərindən biri davamlı məşq və öz üzərində fasiləsiz işləməkdir.

Unutmaq olmaz ki, peşəkarlıq istedadla deyil, davamlı təcrübə ilə formalaşır. Mükəmməlliyə aparan yeganə yol müntəzəm məşq və təkrardır.