Antibiotiklər bir çox bakterial infeksiyaların müalicəsində mühüm rol oynayır. Lakin onların təsiri yalnız xəstəlik törədən bakteriyalarla məhdudlaşmır. Antibiotiklər bağırsaqlarımızda yaşayan faydalı bakteriyaların bir hissəsini də azalda bilər.

 

Bu barədə Aztibb.az-a məlumat verən HTC Cliniva Hospitalın ümumi cərrahı, proktoloq və endoskopisti Anar Əliyev bildirib ki, bu zaman aşağıdakı əlamətlər müşahidə oluna bilər:

İshal və ya qəbizlik

Qarında köp və narahatlıq hissi

Həzm prosesində pozğunluqlar

Bağırsaq mikroflorasının balansının dəyişməsi.

 

Onun sözlərinə görə, bağırsaq sağlamlığını qorumaq üçün antibiotiklər yalnız həkim məsləhəti ilə qəbul edilməli, müalicə kursu yarımçıq saxlanılmamalıdır. Bəzi hallarda həkimin tövsiyəsinə uyğun olaraq probiotiklərdən istifadə bağırsaq mikroflorasının bərpasına kömək edə bilər: "Unutmayın ki, antibiotiklərin düzgün istifadəsi həm müalicənin effektivliyini artırır, həm də həzm sisteminin sağlamlığını qorumağa kömək edir".