Dövlət Gömrük Komitəsinin Tibb Xidməti İdarəsinin rəis müavini, tibb xidməti polkovniki Şahlar Mirqasım Böyük Britaniyanın nüfuzlu University of Cumbria Universitetində tədris olunan MBA in International Healthcare Management (Beynəlxalq Səhiyyə İdarəetməsi üzrə Biznesin İdarəedilməsi Magistri) proqramını Pass with Distinction ("Fərqlənmə ilə") akademik dərəcəsi ilə uğurla başa vurub.

 

Bu barədə Aztibb.az-a Gömrük Hospitalından məlumat verilib.

 

Bildirilib ki, Beynəlxalq Səhiyyə İdarəetməsi üzrə MBA proqramı səhiyyə müəssisələrinin rəhbərləri və idarəediciləri üçün nəzərdə tutulmuş qabaqcıl beynəlxalq təhsil proqramlarından biri olmaqla strateji idarəetmə, liderlik, səhiyyə iqtisadiyyatı, maliyyə idarəetməsi, tibbi xidmətlərin keyfiyyətinin idarə olunması, rəqəmsal transformasiya, innovasiyaların tətbiqi və səhiyyə sistemlərinin dayanıqlı inkişafı istiqamətlərində müasir bilik və bacarıqların formalaşdırılmasına xidmət edir.

 

Əldə olunan beynəlxalq dərəcə səhiyyə sahəsində həyata keçirilən institusional inkişaf, müasir idarəetmə yanaşmalarının tətbiqi, tibbi xidmətlərin keyfiyyətinin və təhlükəsizliyinin yüksəldilməsi, rəqəmsal transformasiya layihələrinin genişləndirilməsi və insan resurslarının inkişafı istiqamətində görülən işlərə mühüm töhfə verəcəkdir. Qazanılmış bilik və beynəlxalq təcrübə səhiyyə xidmətlərinin daha da təkmilləşdirilməsi, qabaqcıl idarəetmə mexanizmlərinin tətbiqi və beynəlxalq standartlara uyğun fəaliyyətin gücləndirilməsi baxımından xüsusi əhəmiyyət kəsb edir.

 

Proqramın Fərqlənmə ilə başa vurulması yüksək akademik göstəricilərin, analitik və strateji düşüncə qabiliyyətinin, müasir səhiyyə idarəetməsi prinsiplərinin dərindən mənimsənilməsinin və liderlik bacarıqlarının beynəlxalq səviyyədə təsdiqi hesab olunur. Bu nəticə yalnız proqram üzrə ən yüksək akademik nailiyyət nümayiş etdirən məzunlara təqdim edilir.