Vebinarın ilk günündə APA-nın sədri, Avrasiya Uşaq Həkimləri Federasiyasının vitse-prezidenti, Azərbaycan Tibb Universitetinin (ATU) II Uşaq xəstəlikləri kafedrasının dosenti, tibb üzrə fəlsəfə doktoru Təranə Tağı-zadənin təqdim etdiyi məruzə "İlkin səhiyyə xidmətində uşaq qastroenterologiyası" mövzusunda olub.

 
Məruzə ilkin səhiyyə halqasında uşaq qastroenteroloji xəstəliklərinin vaxtında diaqnostikasının həyati əhəmiyyəti, mədə-bağırsaq sistemi pozuntularının erkən əlamətlərinin düzgün qiymətləndirilməsi kimi mühüm məsələləri əhatə edib.

 
Alim, müzakirələrdə pofilaktik tədbirlərin gücləndirilməsi və müasir kliniki protokollara əsaslanan müalicə metodlarının effektiv tətbiqindən ətraflı danışıb. Həmçinin dərman vasitələrinin məqsədyönlü təyini üzrə mühüm elmi-praktik tövsiyələrini diqqətə çatdırıb.

Daha sonra APA-nın üzvləri olan, ATU-nun II Uşaq xəstəlikləri kafedrasının təcrübəli həkimləri t.ü.f.d., dosent Ülviyyə Hacıyeva "Uşaqlarda aşağı tənəffüs yollarının infeksiyalarına dair klinik keyslərin təhlili və müalicəsinə müasir baxış", t.ü.f.d., dosent Fəxriyyə Məmmədova "Uşaqların müalicəsində pasiyentmərkəzli yanaşma: imkanlar və perspektivlər" və t.ü.f.d., dosent Lalə Hidayətova “Uşaqlarda iştahanın azalmasına müasir yanaşma: fizioloji xüsusiyyətlərdən xəstəliklərə qədər” mövzularında məruzələr səsləndiriblər.

Bu təqdimatlarda uşaqlarda tənəffüs sistemi xəstəliklərinin diaqnostikası, pasiyent yönümlü tibbi xidmətin uşağın psixo-emosional inkişafındakı rolu, eləcə də iştahasızlığın altındada yatan fizioloji və patoloji səbəblərin düzgün aşkarlanması kimi mühüm elmi-praktik məqamlar xüsusi vurğulanıb.

Vebinarın növbəti günlərində Dr. Ləman Əlirzayeva "Yenidoğulmuşlarda erkən diaqnostika və daban qanı skrininqi", t.ü.f.d. Elnur İmanov "Uşaqlarda qulaqcıqlar arası çəpər defektinin transkateter yolla bağlanması" və Dr. Səbinə Cəfərova "Valideyn–həkim münasibətində etibar böhranı: səbəblər, nəticələr və həll yolları" adlı təqdimatlarla çıxış ediblər.

Çıxışlarda yenidoğulmuşlarda xəstəliklərin daban qanı skrininqi vasitəsilə aşkar edilməsinin vacibliyi, anadangəlmə ürək qüsurlarının transkateter üsullarla uğurlu müalicəsi, habelə həkimlə müalicə alan uşağın valideyni arasında qarşılıqlı inama söykənən ünsiyyətin qurulmasının müalicə prosesinə müsbət təsirləri diqqətə çatdırılıb.

Vebinarın növbəti sessiyasında Dr. Səbinə Xəlilova "Hipotonik uşaq. Sinir-əzələ xəstəlikləri" və Dr. Ülviyyə Quliyeva "Uşaqlarda epilepsiyaların diaqnostikasına müasir yanaşma" mövzusunda çıxış edərək, əzələ gərginliyinin azalması ilə müşahidə olunan mürəkkəb patologiyaların diaqnostikasını, epilepsiyanın müasir müayinə standartları və beynəlxalq protokollara əsaslanan kompleks yanaşma prinsiplərini geniş izah ediblər.

Müzakirələrdə iştirakçıların çoxsaylı sualları məruzəçilər tərəfindən ətraflı cavablandırılıb, klinik təcrübədən nümunələr ətrafında interaktiv fikir mübadiləsi aparılıb.