Uşaq və yeniyetmələr üçün psixi sağlamlıq xidmətlərinin keyfiyyətinin gücləndirilməsi ÜST-nin Avropa Regionunda əsas prioritetlərdən biridir. Hazırda regionda hər beş yeniyetmədən biri psixi sağlamlıq problemi ilə yaşayır, 15–29 yaşlı gənclər arasında isə intihar ölümün əsas səbəblərindən biri olaraq qalır.
Bu məqsədlə Tacikistanın Düşənbə şəhərində keçirilən ÜST Avropa Regionunun Keyfiyyətli Tibbi Yardım və Pasiyent Təhlükəsizliyi Məktəbi – Mərkəzi Asiya üzrə Xüsusi Buraxılış: Uşaq və Yeniyetmələrin Psixi Sağlamlığı Xidmətlərinin Keyfiyyəti üzrə Regional Görüş ölkələr arasında təcrübə mübadiləsi, əməkdaşlığın gücləndirilməsi və psixi sağlamlıq xidmətlərinin keyfiyyətinin yaxşılaşdırılması istiqamətində birgə fəaliyyətin sürətləndirilməsi üçün mühüm platforma olub.
Bu barədə Aztibb.az-a ÜST-nin Azərbaycan Nümayəndəliyindən məlumat verilib.
Bildirilib ki, görüşdə Azərbaycan Respublikasının Səhiyyə Nazirliyi ÜST-nin Azərbaycan Ölkə Ofisi ilə birlikdə ölkədə əldə olunan nailiyyətləri təqdim edib, digər ölkələrin təcrübəsini öyrənib və gələcək əməkdaşlıq imkanlarını müzakirə edərək regional dialoqda fəal iştirak edib.
Tədbir çərçivəsində Uşaq və Yeniyetmələrin Psixi Sağlamlığı Xidmətləri üzrə ÜST Keyfiyyət Standartları, Psixi Sağlamlıq Sistemlərinin Xəritələndirilməsi Aləti və Klinik Audit Aləti təqdim olunub. Eyni zamanda, iştirakçılar qabaqcıl təcrübələri bölüşüb, mövcud çağırışları və boşluqları müzakirə edib, potensialın gücləndirilməsi və xidmət keyfiyyətinin davamlı yaxşılaşdırılması üzrə növbəti addımları müəyyənləşdiriblər.
Görüşün əsas mesajı ondan ibarət idi ki, yüksək keyfiyyətli, insanyönümlü psixi sağlamlıq xidmətlərinin təmin edilməsi üçün güclü liderlik, davamlı investisiyalar, peşəkar və dəstəklənən insan resursları, keyfiyyətin davamlı təkmilləşdirilməsi, eləcə də uşaqların, yeniyetmələrin və onların ailələrinin qərarvermə proseslərinə mənalı şəkildə cəlb olunması həlledici əhəmiyyət daşıyır.
Tədbir çərçivəsində Azərbaycan Respublikasının Səhiyyə Nazirliyi ilə Tacikistan Respublikasının Səhiyyə və Əhalinin Sosial Müdafiəsi Nazirliyi arasında uşaq və yeniyetmələrin psixi sağlamlığı xidmətlərinin keyfiyyətinin yaxşılaşdırılması sahəsində əməkdaşlığın gücləndirilməsinə dair Memorandum imzalanıb.
Birgə əməkdaşlıq, qarşılıqlı öyrənmə və təcrübə mübadiləsi sayəsində region ölkələri hər bir uşaq və gənc üçün daha keyfiyyətli, əlçatan və insanyönümlü psixi sağlamlıq xidmətlərinin qurulması istiqamətində mühüm addımlar atırlar.
