Beyləqan Rayon Mərkəzi Xəstəxanasının Təcili Tibbi Yardım şöbəsinin əməkdaşları üçün "Təcili hallarda ilkin yardım və CPR (ürək-ağciyər reanimasiyası) qaydaları" mövzusunda təlim təşkil olunub.
Xəstəxanadan Aztibb.az-a verilən məlumata görə, təlim həkim-reanimatoloq Elşən Hacıyev tərəfindən keçirilib. Təlim zamanı təcili hallarda ilkin tibbi yardımın göstərilməsi prinsipləri, CPR-in düzgün icra qaydaları, hava yolunun açıq saxlanılması, həyati göstəricilərin qiymətləndirilməsi və kritik vəziyyətlərdə operativ müdaxilə üsulları barədə ətraflı məlumat verilib.
Praktiki məşğələlərlə müşayiət olunan təlim zamanı CPR alqoritmi nümayiş etdirilib, iştirakçılar müxtəlif klinik vəziyyətlər üzrə praktiki bacarıqlarını təkmilləşdirmək imkanı əldə ediblər. Tibb bacılarının sualları cavablandırılıb, gündəlik fəaliyyətlərində qarşılaşa biləcəkləri təcili hallarla bağlı tövsiyələr verilib.
Belə təlimlərin keçirilməsində məqsəd tibb işçilərinin nəzəri bilik və praktik bacarıqlarını artırmaq, təcili tibbi yardımın keyfiyyətini daha da yüksəltmək və pasiyentlərə vaxtında, düzgün tibbi yardımın göstərilməsini təmin etməkdir.
