Aztibb.az-ın xəbərinə görə, seminarı giriş nitqi ilə Dövlət Təhlükəsizliyi Xidmətinin Hərbi Tibb Baş İdarəsinin rəis müavini, tibb xidməti polkovniki Rauf Abbasov açaraq klinik genetik testlərin müasir səhiyyə sistemində rolu, multidissiplinar əməkdaşlığın əhəmiyyəti, eləcə də fərdiləşdirilmiş tibbin inkişaf perspektivləri barədə məlumat verib.

 

Tədbirdə biologiya üzrə fəlsəfə doktoru Cəmilə Bayramovanın “DTX Genetik Araşdırmalar Mərkəzi: diaqnostik imkanlar və klinik xidmətlər”; tibb elmləri doktoru Rəşad Şolanın “Uroloji praktikada klinik genomika: risk stratifikasiyasından fərdi müalicəyə”, tibb üzrə fəlsəfə doktoru Samir Qurbanovun “Süd vəzi xərçəngində irsi riskin idarə edilməsi: BRCA-dan multigen panellərə”, Dr. Rəxşəndə Əliyevanın “Müasir ginekologiyada genetik testlərin yeri” mövzusunda məruzələri dinlənilib.

Seminar çərçivəsində klinik genetik testlərin urologiya, onkologiya, mammologiya və ginekologiya sahələrində tətbiqi, molekulyar diaqnostikanın müasir imkanları, fərdiləşdirilmiş tibbin aktual yanaşmaları, həmçinin multidissiplinar əməkdaşlığın elmi-praktik əhəmiyyəti ətrafında müzakirələr aparılıb.

 

Tədbirin sonunda klinik genetikanın gündəlik tibbi praktikaya inteqrasiyasının genişləndirilməsi, müasir diaqnostik yanaşmaların tətbiqinin təşviqi və müxtəlif ixtisaslar üzrə mütəxəssislər arasında elmi bilik və təcrübə mübadiləsinin gücləndirilməsi baxımından bu cür elmi-praktik seminarların mühüm əhəmiyyət kəsb etdiyi vurğulanıb.