Ən çox ürək-damar, onkoloji və endokrin xəstəliklər ömür müddətini qısaldır

Ürək-damar, onkoloji və endokrin xəstəliklər insanın ömür uzunluğunu əhəmiyyətli dərəcədə azalda bilər.

Aztibb.az "(zvestiya" nəşrinə istinadən yazır ki, bu barədə Rusiya Elmlər Akademiyasının akademiki, Rusiya Təhsil Akademiyasının vitse-prezidenti Gennadi Onişşenko müsahibəsində bildirib.

"Xəstəliklərin əsas qrupları mövcuddur. Həm ömür müddətinin qısalmasına, həm də xəstələrin sayına görə birinci yerdə ürək-damar xəstəlikləri dayanır. İkinci yerdə onkoloji, üçüncü yerdə isə endokrin xəstəliklər gəlir. İnsan həyatını ən çox məhz bu üç əsas xəstəlik qrupu təhlükə altına qoyur", – deyə o bildirib.

Akademik vurğulayıb ki, adi soyuqdəymə də daxil olmaqla istənilən xəstəlik, vaxtında müalicə olunmadıqda, orqanizmin ümumi sağlamlıq vəziyyətinə mənfi təsir göstərə bilər.

Qeyd edib ki, son illərdə süd vəzi xərçəngi 40 yaşdan aşağı qadınlarda daha tez-tez diaqnoz olunur. Gənc yaşlarda süd vəzi xərçəngi riskini artıran ən mühüm amillərdən biri artıq bədən çəkisidir.