Türkiyəli həkimlər tibb tarixində mühüm nailiyyətə imza ataraq ana bətnində inkişaf edən dölün onurğa sütunundakı anadangəlmə qüsuru yüksək texnologiyalı qapalı fetoskopik cərrahi üsulla uğurla aradan qaldırıblar.

Aztibb.az "HaberTürk"ə istinadən yazır ki, əməliyyatın uğurla həyata keçirilməsi üçün mama-ginekoloqlar, uşaq cərrahları, neyrocərrahlar, anestezioloqlar, neonatoloqlar və digər mütəxəssislərdən ibarət 30 nəfərlik tibbi komanda birgə çalışıb.

Müdaxilə zamanı cərrahlar ananın uşaqlığına xüsusi mikro-kameralar və millimetr dəqiqliyinə malik cərrahi alətlər vasitəsilə daxil olaraq dölün onurğa sütunundakı açıqlığı qapadıblar.

Mütəxəssislərin sözlərinə görə, bu əməliyyat həyata keçirilməsəydi, körpədə aşağı ətrafların iflici, sidik kisəsi və bağırsaq funksiyalarının ciddi pozulması, həmçinin hidrosefaliya kimi ağır nevroloji fəsadların inkişaf riski yüksək idi.

Həkimlərin peşəkarlığı və ailənin əzmkarlığı sayəsində əməliyyat uğurla başa çatıb. Bildirilir ki, sağlamlığına qovuşan körpəyə ümid və yeni həyatın rəmzi olaraq "Umut" adı veriləcək.