Aztibb.az xəbər verir ki, körpənin çəkisinin az, anemiyanın olmasına baxmayaraq müayinə zamanı yırtıq möhtəviyyatının qarın boşluğuna qaytarılmasının mümkün olmadığı müəyyən edildiyindən, müayinələrdən sonra xəstə təxirəsalınmaz cərrahi müdaxiləyə götürülüb.

 

Əməliyyat uşaq cərrahı Heyrət Əhmədov tərəfindən həyata keçirilib. Cərrahi briqadanın tərkibində assistent Sabir Novruzov və anestezioloq Nailə Səlimova da iştirak ediblər. İcra olunan əməliyyat zamanı sol qasıq nahiyəsində boğulmuş yırtıq açılaraq bağırsaq ilgəkləri sərbəstləşdirilib. Cərrahiyyə zamanı bağırsağın təxminən 25 sm-lik hissəsinin boğulduğu, ödem və qan dövranının pozulması əlamətlərinin olduğu müəyyən edilib. Bağırsağın həyat qabiliyyəti əməliyyat zamanı qiymətləndirilib və qənaətbəxş hesab olunduğundan rezeksiya aparılmadan qarın boşluğuna yerləşdirilib.

 

Daha sonra sağ tərəfli qasıq yırtığı da cərrahi yolla aradan qaldırılıb və hər iki tərəfdə yırtıq plastikası icra olunub.

 

Vaxtında göstərilən ixtisaslaşmış tibbi yardım sayəsində yaranan problem aradan qaldırılıb və körpə yenidən Respublika Pediatrik Mərkəzə təhvil verilib. Bu əməliyyatdan sonra körpənin RPM-də stasionar müalicə alan qardaşıda institutun cərrahları tərəfindən konsultasiya edilib və planlı əməliyyat nəzərdə tutulub, həmçinin tövsiyələr verilib.

 

Pediatriya İnstitutu valideynlərə tövsiyə edir ki, uşaqlarda qasıq nahiyəsində şişkinlik, qəfil ağrı, qusma və ya nəcisində qanlı ifrazat görünərsə, vaxt itirmədən cərrahiyyə şöbəsi olan tibb müəssisəsinə müraciət etsinlər. Boğulmuş qasıq yırtığı təcili cərrahi müdaxilə tələb edən və gecikdirildiyi halda fəsadlara səbəb ola bilən vəziyyətdir.