Tədris Cərrahiyyə Klinikasında ağır dərəcəli varikoz xəstəliyindən əziyyət çəkən pasiyent üzərində minimal invaziv endovenoz lazer əməliyyatı uğurla icra olunub.

Klinikanın ümumi cərrahı Babək Abbasəliyev Aztibb.az-a bildirib ki, uzun müddətdir sol aşağı ətrafda ağrı, şişkinlik, gecə qıcolmaları və sağalmayan trofik yara ilə müraciət edən pasiyent ətraflı müayinədən keçirilib. Doppler ultrasəs müayinəsi zamanı böyük dərialtı venada genişlənmə, venoz qapaq çatışmazlığı və uzun seqment boyunca patoloji reflüks müəyyən olunub. Klinik qiymətləndirməyə əsasən pasiyentdə CEAP təsnifatına uyğun C6 mərhələli xroniki venoz çatışmazlıq diaqnozu təsdiqlənib.

Mütəxəssisin sözlərinə görə, venanın genişlənmə dərəcəsi və reflüksün davametmə müddəti nəzərə alınaraq açıq cərrahi müdaxilə əvəzinə müasir endovenoz lazer ablasiyası (EVLA) üsulunun tətbiqinə qərar verilib.

Əməliyyat lokal tumescent anesteziya altında icra olunub. Ultrasəs nəzarəti ilə venaya lazer kateteri yerləşdirilərək reflüks yaradan damar boyunca lazer enerjisi tətbiq edilib və xəstə venanın bağlanması təmin olunub. Cərrahi müdaxilə təxminən 50–60 dəqiqə davam edib və hər hansı ağırlaşma qeydə alınmayıb.

Həkimin sözlərinə görə, varikoz xəstəliyi vaxtında müalicə edilmədikdə trofik xoraların yaranması, tromboflebit, dərin vena trombozu və ağciyər tromboemboliyası kimi ciddi ağırlaşmalara səbəb ola bilər.