Moskvada uğursuz əməliyyat olunan 27 yaşlı xəstə ATU-nun Tədris Cərrahiyyə Klinikasının həkimləri tərəfindən yenidən həyata qaytarılıb. Əvvəl Moskvada, sonra isə Bakının digər klinikasında əməliyyatlar nəticəsində xəstənin öd yolunda yaranmış ağır zədələnmə həkimlərimizin təkrar rekonstruktiv cərrahi müdaxiləsi sayəsində aradan qaldırılıb.

Klinikadan Aztibb.az-a bildirilib ki, əməliyyat ATU -nun Ümumi cərrahlıq kafedrasının professoru, TCK-nın ümumi cərrahı Çərkəz Cəfərovun başçılğı ilə həyata keçirilib.

Professor Çərkəz Cəfərovun verdiyi məlumata görə, xəstə bu ilin mart ayında Moskva şəhərində laparoskopik xolesistektomiya (öd kisəsinin çıxarılması) əməliyyatı keçirib. Lakin əməliyyat zamanı yatrogen zədələnmə nəticəsində xəstədə ümumi öd axarı kəsilib və öd yollarının təbii bağlantısı pozulub. Bunun ardından xəstədə sarılıq baş verdiyinə görə bir gün sonra xəstə yenidən açıq əməliyyata götürülüb və öd axınının bərpası məqsədilə Roux-en-Y tipli anastomoz (qaraciyərdən gələn öd yollarının nazik bağırsaqla xüsusi üsulla birləşdirilməsi) yaradılıb.

İlk vaxtlar xəstənin vəziyyəti stabil olsa da, təxminən bir ay yarım sonra yenidən sarılıq inkişaf edib. Azərbaycana qayıtdıqdan sonra o, Bakıda klinikalardan birinə müraciət edib. Burada anastomoz nahiyəsində yaranmış daralmanı aradan qaldırmaq üçün balon dilatasiyası aparılıb. Lakin prosedur gözlənilən nəticəni vermədiyindən qaraciyərin sağ və sol paylarına perkutan drenajlar yerləşdirilib.