Yeni Klinikada Azərbaycan Hepato-Pankreato-Biliar Cərrahlar İctimai Birliyinin təşkilatçılığı ilə "Qaraciyər sağlamlığı və transplantasiya mövzusunda maarifləndirmə" tədbiri həyata keçirilib.

 

Klinikadan Aztibb.az-a bildirilib ki, tədbirin əsas məqsədi qaraciyər sağlamlığının qorunması, qaraciyər xəstəliklərinin erkən diaqnostikası, profilaktik tədbirlərin təşviqi, sağlam həyat tərzinin təbliği, virus hepatitləri barədə ictimai məlumatlılığın artırılması və qaraciyər transplantasiyası sahəsində maarifləndirmənin gücləndirilməsi olub.

 

Açılış mərasimində Yeni Klinikanın direktor müavini, Azərbaycan Hepato-Pankreato-Biliar Cərrahlar İctimai Birliyinin sədri Eldar Əhmədov layihənin məqsədi, qarşıya qoyulan vəzifələr, həyata keçiriləcək fəaliyyətlər və gözlənilən nəticələr barədə geniş məlumat verib. O, bu layihənin qaraciyər xəstəliklərinin profilaktikası istiqamətində əhalinin məlumatlılığının artırılmasına və sağlam həyat tərzinin təşviqinə xidmət etdiyini qeyd edib.

 

Tədbirin elmi hissəsində Dr. İntizar Məmmədova "Qaraciyər sağlamlığı: profilaktikadan transplantasiyaya uzanan yol", dietoloq Gülnar Abdullayeva "Qaraciyərin qorunmasında qidalanmanın rolu", infeksionist İbrahim Rufullayev isə "Hepatit C" mövzusunda təqdimatlarla çıxış ediblər.

 

Məruzələr zamanı qaraciyər sağlamlığının qorunması yolları, düzgün qidalanmanın bu prosesdəki əhəmiyyəti, hepatit C virusunun yoluxma yolları, müasir diaqnostika və müalicə imkanları, eləcə də profilaktik tədbirlər barədə iştirakçılara ətraflı məlumat verilib.

 

Tədbirin sonunda təşkil olunan "Mənim sualım var" adlı interaktiv sessiya çərçivəsində iştirakçılar onları maraqlandıran sualları məruzəçilərə ünvanlayıblar.