33 həftəlik 2100 qram bədən çəkisi ilə doğulan yenidoğulmuş ağır vəziyyətdə Səhiyyə Nazirliyi K.Y.Fərəcova adına Elmi-Tədqiqat Pediatriya İnstitutunun Yenidoğulmuşların Reanimasiya və İntensiv Terapiya Şöbəsinə (YRİTŞ) hospitalizasiya olunub.

 

İnstitutdan Aztibb.az-a verilən məlumata görə, şöbədə aparılan klinik, laborator və instrumental müayinələr nəticəsində pasiyentə yeni doğulmuşun tənəffüs pozğunluğu sindromu, doğuş zamanı az bədən çəkisinin digər halları və törədicisi müəyyən olunmamış pnevmoniya diaqnozları qoyulub.

 

Yenidoğulmuşun müalicəsi həkim Afət Ağayeva tərəfindən aparılıb, müalicə prosesi şöbə müdirinin daimi nəzarəti altında həyata keçirilib. Vəziyyəti stabilləşdikdən sonra körpə müalicəsinin davam etdirilməsi məqsədilə Vaxtından Qabaq Doğulmuşların Patologiyası Şöbəsinə (VQDPŞ) köçürülüb. Şöbə müdirinin nəzarəti altında müalicə həkim Arzu Piriyeva tərəfindən müalicəsi davam etdirilib.

Aparılan kompleks müalicə tədbirləri nəticəsində yenidoğulmuşun ümumi vəziyyəti əhəmiyyətli dərəcədə yaxşılaşıb, tənəffüs funksiyası bərpa olunub, qidalanması normallaşıb və bədən çəkisi 2600 qrama çatıb.

 

Körpənin ailə üzvləri göstərilən yüksək ixtisaslı tibbi xidmətə, həssas və qayğıkeş münasibətə görə ETPİ-nin rəhbərliyinə, müalicə həkimlərinə, bütün tibb heyətinə dərin minnətdarlıqlarını bildiriblər.