Taylandın Mahidol Universitetinin alimləri "Litsea cubeba" (may çanq) adlı bitkinin yağından istifadə edərək ağcaqanadlara qarşı "MosShield" adlı tamamilə bitki mənşəli yeni bir sprey hazırlayıblar.

Aztibb.az sciencex.com-a istinadla xəbər verir ki, "Litsea cubeba" xoş sitrus, yəni limonvari ətrə malik olan və təbiətdə həşəratları özündən qaçıran xüsusi bir koldur. Tədqiqatçılar bu bitkinin yağından hazırlanan spreyin insan dərisinə mənfi təsirini ölçmək üçün 48 könüllü üzərində sınaqlar aparıblar. Dəriyə vurulan spreyin nəticələri yarım saat, iki gün və dörd gün sonra yoxlanılıb və vasitənin heç bir qıcıqlanma, qızartı və ya allergiya yaratmadığı sübut olunub.

Növbəti mərhələdə isə spreyin effektivliyi ən təhlükəli ağcaqanad növləri üzərində test edilib. Könüllülər qollarını sprey edərək Denqe qızdırması və Zika virusu daşıyan "Aedes", malyariya yayan "Anopheles" və Qərbi Nil virusu yayan "Culex" ağcaqanadlarının olduğu qəfəslərə daxil ediblər. Sınaqlar göstərib ki, təbii sprey "Culex" növünə qarşı dörd saata yaxın (3.8 saat), digər iki təhlükəli növə qarşı isə iki saat boyunca tam müdafiə təmin edir.

Alimlər bu bitki mənşəli spreyi tezliklə real təbiət şəraitində sınaqdan keçirməyi və kimyəvi preparatlara tam zərərsiz bir alternativ kimi satışa çıxarmağı planlaşdırırlar.