Çəkinin idarə olunması və şəkərli diabetin müalicəsində istifadə edilən, QLP-1 (GLP-1) reseptor agonistləri qrupuna aid məşhur preparatları qəbul edən pasiyentlər getdikcə daha çox bildirirlər ki, artıq alkoqol onlarda əvvəlki kimi həzz hissi yaratmır və spirtli içkilərə qarşı istək nəzərəçarpacaq dərəcədə azalır. Bu barədə endokrinoloq İrina Lenkina məlumat verib.

Aztibb.az "Life" portalına istinadən yazır ki, həkimin sözlərinə görə, qida, alkoqol və digər stimullardan alınan həzz hissinə cavabdeh olan beynin mükafatlandırma sistemi dopaminlə sıx əlaqəlidir. QLP-1 reseptor agonistləri dopamin yollarına və mükafatlandırma mərkəzlərindəki neyronların fəaliyyətinə təsir göstərdiyindən, beyin alkoqolu əvvəlki qədər həzz mənbəyi kimi qəbul etmir. Nəticədə spirtli içki qəbul etmək istəyi zəifləyir.

İrina Lenkinanın sözlərinə görə, bu təsir əsasən alkoqol istifadəsi pozuntusu diaqnozu qoyulmuş şəxslərdə müşahidə edilib ki, bu da həmin preparatların gələcəkdə alkoqol asılılığının müalicəsində potensial vasitə kimi qiymətləndirilməsinə əsas verir. Klinik praktikada bəzi pasiyentlər alkoqola marağın azalması, həmçinin şirniyyat və qəlyanaltılara qarşı impulsiv istəyin zəiflədiyini də bildiriblər.

Bununla yanaşı, həkim vurğulayıb ki, alkoqola olan meyli azaltmaq məqsədilə bu preparatlardan həkim təyinatı və tibbi göstəriş olmadan istifadə etmək hələ tezdir. Hazırda preparatların dayandırılmasından sonra bu təsirin davam edib-etməyəcəyi, uzunmüddətli qəbul zamanı hansı əlavə təsirlərin yarana biləcəyi və ümumilikdə uzunmüddətli təhlükəsizliyi barədə kifayət qədər elmi məlumat mövcud deyil.