Bel ağrıları yaxın gələcəkdə keçmişdə qala bilər. Alimlər fəqərəarası diskin daxilinə yeridilən və onun bərpasını stimullaşdıran yeni hidrogel hazırlayıblar.

Aztibb.az "News Novorossiysk" sosial media orqanına istinadən yazır ki, bu hidrogel tədricən az miqdarda hidrogen-sulfid (H₂S) ifraz edir. Hidrogen-sulfid siqnal molekulu kimi fəaliyyət göstərərək iltihabı azaldır, toxumaların dağılmasının qarşısını alır və fəqərəarası diskin möhkəmliyini, elastikliyini təmin edən II tip kollagen və aqrekanın sintezini stimullaşdırır.

Laboratoriya və preklinik tədqiqatlarda hidrogel hüceyrə və toxumaların vəziyyətini yaxşılaşdırıb. Heyvanlar üzərində aparılan eksperimentlərdə isə fəqərəarası disklərin degenerasiyasını ləngidib və ağrını əhəmiyyətli dərəcədə azaldıb.

Bu nəticələr göstərir ki, yeni hidrogel gələcəkdə bel ağrıları və degenerativ disk xəstəliklərinin müalicəsində perspektivli yanaşmalardan biri ola bilər. Hazırda preparatın insanlar üzərində klinik sınaqlara keçməsi üçün əlavə tədqiqatlar tələb olunur.