Diabetik ayaq 2-ci tip şəkərli diabetin ən ağır fəsadlarından biridir və xora, infeksiya, hətta aşağı ətrafın amputasiyasına səbəb ola bilər.

Aztibb.az xəbər verir ki, endokrinoloq Fərhad Burzunun bildirdiyinə görə, ENDO 2026 konqresində təqdim olunan yeni tədqiqatda GLP-1 reseptor aqonistləri ilə SGLT2 inhibitorlarının diabetik ayaq ağırlaşmalarına təsiri müqayisə edilib.

Beş il ərzində 630 mindən çox 2-ci tip şəkərli diabet xəstəsinin məlumatlarının təhlili göstərib ki, GLP-1 reseptor aqonistləri qəbul edən şəxslərdə osteomielit, diabetik ayaq xorası və aşağı ətraf amputasiyası riski daha aşağı olub. SGLT2 inhibitorları qəbul edənlərdə isə diabetik periferik neyropatiya riski müəyyən qədər azalsa da, bu təsir diabetik ayaq ağırlaşmalarının qarşısını almaq üçün kifayət etməyib.

Mütəxəssislər xatırladırlar ki, əvvəlki nəsil bəzi SGLT2 inhibitorlarının diabetik ayaq ağırlaşmaları riskini artıra biləcəyi ilə bağlı narahatlıqlar mövcud olub. Bununla belə, bu preparatlar ürək-damar sistemi və böyrəklərin qorunmasında mühüm klinik üstünlüklərə malikdir.

Tədqiqat müəllifləri vurğulayırlar ki, şəkərli diabetin müalicəsi hər bir xəstə üçün fərdiləşdirilməli, xüsusilə diabetik ayaq riski yüksək olan şəxslərdə ayaqların müntəzəm müayinəsi, erkən diaqnostika və profilaktik tədbirlər əsas prioritet olmalıdır. Eyni zamanda qeyd edilir ki, bu araşdırma müşahidə xarakteri daşıdığından, əldə olunan nəticələrin təsdiqlənməsi üçün əlavə randomizə olunmuş klinik tədqiqatlara ehtiyac var.