Tədris Cərrahiyyə Klinikasında ATU-nun I Cərrahi xəstəliklər kafedrasının müdiri, professor Nuru Bayramov və kafedranın dosenti Babək Zeynalov tərəfindən öd daşı xəstəliyinin ağırlaşmış forması diaqnozu qoyulan pasiyent üzərində mürəkkəb laparoskopik xolesistektomiya əməliyyatı uğurla icra olunub.

Bu barədə Aztibb.az-a Klinikadan məlumat verilib.

Müayinələr zamanı pasiyentdə uzun illər davam edən öd daşı xəstəliyi fonunda fleqmonoz dəyişikliklərə məruz qalmış, kəskin iltihablaşmış və ətraf toxumalarla sıx bitişmələr əmələ gətirmiş öd kisəsi aşkarlanıb. Məhz bu səbəbdən cərrahi müdaxilə texniki baxımdan mürəkkəb hesab olunub.

Əməliyyat zamanı öd kisəsinin arteriyası və öd axacağı diqqətlə identifikasiya edilərək təhlükəsiz şəkildə bağlanıb, daha sonra isə öd kisəsi laparoskopik üsulla tam çıxarılıb. Qapalı üsulla icra olunan əməliyyat pasiyentin daha qısa müddətdə bərpa olunmasına və əməliyyatdan sonrakı ağırlaşma riskinin minimuma endirilməsinə imkan yaradır.

Mütəxəssislərin sözlərinə görə, öd daşı xəstəliyi hazırda cərrahi patologiyalar arasında ən çox rast gəlinən xəstəliklərdən biridir. Müasir diaqnostik üsulların – ultrasəs müayinəsi, kompüter tomoqrafiyası və maqnit-rezonans tomoqrafiyasının geniş tətbiqi nəticəsində xəstəliyin erkən mərhələdə aşkarlanması xeyli asanlaşıb. Öd daşı xəstəliyinin yaranmasında qaraciyərdə sintez olunan ödün tərkibinin dəyişməsi və litogen ödün formalaşması əsas rol oynayır. Xəstəliyə qadınlarda daha çox rast gəlinir ki, bu da hormonal dəyişikliklər, xüsusilə hamiləlik dövründə öd durğunluğunun artması ilə əlaqələndirilir. Bundan əlavə, qeyri-sağlam qidalanma və oturaq həyat tərzi də risk amilləri sırasında yer alır.

Mütəxəssis vurğulayıb ki, öd daşı xəstəliyinin vaxtında diaqnostika və müalicə olunmaması kəskin iltihab, öd yollarının tutulması, pankreatit və digər həyati təhlükə yaradan ağırlaşmalara səbəb ola bilər. Buna görə də risk qrupuna daxil olan şəxslərin mütəmadi müayinədən keçməsi və göstəriş olduğu hallarda cərrahi müalicəni gecikdirməməsi tövsiyə edilir.