Endoskopiya (qastroskopiya) qida borusu, mədə və onikibarmaq bağırsağın kamera vasitəsilə müayinə edilməsinə imkan verən müasir diaqnostik üsuldur. Bu müayinə bir çox xəstəliyin erkən aşkarlanması və düzgün müalicə planının seçilməsi üçün mühüm əhəmiyyət daşıyır.

 

Bu barədə Aztibb.az-a HTC Cliniva Hospitalın ümumi cərrahı, proktoloq və endoskopisti məlumat verib.

 

Onun sözlərinə görə, aşağıdakı hallarda endoskopiya tövsiyə oluna bilər:

Uzunmüddətli mədə ağrısı - Davamlı və ya təkrarlayan mədə ağrıları səbəbin müəyyənləşdirilməsi üçün araşdırılmalıdır.

Mədə yanması və reflüks - Tez-tez təkrarlanan yanma hissi və turşunun ağıza gəlməsi qida borusunda və ya mədədə dəyişikliklərin göstəricisi ola bilər.

Udma çətinliyi - Qidanın boğazda və ya döş qəfəsində ilişib qalması hissi mütləq qiymətləndirilməlidir.

Ürəkbulanma və ya qusma - Səbəbi aydın olmayan və uzun müddət davam edən şikayətlər endoskopik müayinə tələb edə bilər.

Mədə və ya onikibarmaq bağırsaq xorası şübhəsi - Endoskopiya xoranın diaqnostikası və müalicənin effektivliyinin qiymətləndirilməsi üçün ən dəqiq üsullardan biridir.

Mədə qanaxması əlamətləri - Qara rəngli nəcis, qanlı qusma və ya səbəbi bilinməyən qanazlığı kimi hallar təcili qiymətləndirilməlidir.

Biopsiya götürülməsinə ehtiyac olduqda - Lazım gəldikdə endoskopiya zamanı toxuma nümunəsi götürülərək dəqiq diaqnoz qoyula bilər.

 

"Endoskopiya erkən diaqnostika baxımından böyük əhəmiyyət daşıyır. Müayinənin vaxtında aparılması bir çox mədə və həzm sistemi xəstəliklərinin erkən aşkar edilməsinə və müalicəsinin gecikməməsinə kömək edir", - deyə həkim əlavə edib.