Qulaq, Burun və Boğaz (QBB) mütəxəssisi Op. Dr. Enver Ferruh İnan bildirib ki, adenoid (burun-udlaq badamcığı) və badamcıqların böyüməsi burun tutulması, ağızdan nəfəsalma, xoruldama və yuxu keyfiyyətinin pisləşməsi ilə özünü göstərə bilər. Uzun müddət davam edən bu şikayətlər mütləq mütəxəssis tərəfindən qiymətləndirilməlidir.

Aztibb.az "CNN Türk"ə istinadən yazır ki, adenoid və badamcıqlar immun sisteminin bir hissəsi olsa da, onların böyüməsi və ya tez-tez iltihablanması tənəffüs yollarını daralda bilər. Nəticədə burundan rahat nəfəs almaq çətinləşir, ağızdan nəfəsalma, udma çətinliyi, xoruldama və səhərlər yorğun oyanma kimi əlamətlər yaranır.

Mütəxəssisin sözlərinə görə, adenoid böyüməsi bəzən tez-tez təkrarlanan qulaq infeksiyaları, qulaqda dolğunluq hissi və eşitmənin zəifləməsi ilə də müşayiət oluna bilər. Buna görə burun tutulması ilə yanaşı qulaq şikayətləri də varsa, hər iki nahiyə birlikdə müayinə edilməlidir.

Badamcıqların həddindən artıq böyüməsi isə udma zamanı çətinlik, boğazda yad cisim hissi, bərk qidaları qəbul etməkdə çətinlik, səs tonunun dəyişməsi və ağız açıq yatma kimi problemlərə səbəb ola bilər. İnfeksiya qoşulduqda boğaz ağrısı, qızdırma, udqunarkən ağrı, boyun limfa düyünlərində həssaslıq və ağız qoxusu da müşahidə edilə bilər.

Həkim qeyd edib ki, adenoid və ya badamcıqların böyüməsi yuxu zamanı yuxarı tənəffüs yollarını daraldaraq xoruldamaya səbəb ola bilər. Əgər xoruldama yuxuda nəfəsin qısa müddət dayanması, boğularaq oyanma, gecə tez-tez oyanma və ya səhərlər güclü yorğunluqla müşayiət olunursa, yuxu apnesi ehtimalı mütləq araşdırılmalıdır.

Müalicə olunmayan hallarda uşaqlarda çənə və üz skeletinin inkişafında pozğunluqlar, eşitmə problemləri yarana bilər. Böyüklərdə isə yuxu apnesi ürək-damar və beyin xəstəlikləri riskini artıra bilər.

Müalicə xəstənin vəziyyətindən asılı olaraq dəyişir. Bəzi hallarda müşahidə, allergiyanın müalicəsi və infeksiyaların nəzarətdə saxlanılması kifayət edir. Lakin hava yolunun ciddi daralması, yuxuda tənəffüs pozğunluğu, tez-tez təkrarlanan infeksiyalar, udma və ya eşitmə problemləri olduqda cərrahi müdaxilə tövsiyə oluna bilər. Həkim vurğulayır ki, əsas məqsəd yalnız adenoid və badamcıqların ölçüsünü deyil, həm də sağlam tənəffüsü, keyfiyyətli yuxunu və ümumi həyat keyfiyyətini qorumaqdır.