Heç bir fiziki yüklənmə olmadan, sakit vəziyyətdə ürək döyüntülərinin sürətlənməsi orqanizmdə ciddi sağlamlıq problemlərinin xəbərçisi ola bilər. Bu barədə kardioloq Sergey Veçtomov bildirib.

Aztibb.az "İzvestiya" nəşrinə istinadən yazır ki, həkimin sözlərinə görə, istirahət zamanı ürək döyüntüsünün sürətlənməsi ilk növbədə arterial hipertenziya, ürək çatışmazlığı və müxtəlif ürək ritm pozğunluqlarının əlaməti ola bilər. Bu pozğunluqlara supraventrikulyar taxikardiya, qulaqcıqların fibrillyasiyası, mədəciklərin fibrillyasiyası və kardioloq tərəfindən mütləq qiymətləndirilməsi tələb olunan digər hallar daxildir.

Kardioloq qeyd edib ki, bu əlamət yalnız ürək xəstəlikləri ilə məhdudlaşmır. Ürək döyüntüsünün sürətlənməsi qalxanabənzər vəz və ya böyrəküstü vəzilərin xəstəlikləri kimi hormonal pozğunluqların, eləcə də anemiyanın göstəricisi də ola bilər.

Bundan başqa, susuzlaşma, elektrolit çatışmazlığı, müxtəlif infeksion xəstəliklər və güclü stress də istirahət zamanı nəbzin artmasına səbəb ola bilər.

Sergey Veçtomov vurğulayıb ki, əgər sakit vəziyyətdə nəbz davamlı olaraq dəqiqədə 100 vurğunu keçirsə, vaxt itirmədən həkimə müraciət etmək lazımdır.

Digər kardioloq və terapevt, tibb üzrə fəlsəfə doktoru Andrey Kondraxin isə qeyd edib ki, oturaq həyat tərzi ürək-damar sisteminin kifayət qədər yüklənməməsinə səbəb olur. Bu isə zamanla ürək-damar sağlamlığının zəifləməsinə və müxtəlif xəstəliklərin inkişaf riskinin artmasına gətirib çıxara bilər.