Bu barədə Aztibb.az-a məlumat verən Telman Əmirov bildirib ki, pasiyent klinikaya bağırsaq qanaxması şikayəti ilə müraciət edib. Aparılan klinik və instrumental müayinələr nəticəsində düz bağırsağın aşağı hissəsində, əvvəllər formalaşdırılmış kolostoma nahiyəsinə yaxın yerləşən qanayan törəmə aşkarlanıb. Xəstənin anamnezindən məlum olub ki, o, daha əvvəl düz bağırsaq patologiyası ilə əlaqədar cərrahi əməliyyat keçirib və həmin dövrdə kolostoma formalaşdırılıb.

 

Pasiyent üzərində bağırsağın aşağı hissəsinin rekonstruktiv əməliyyatı həyata keçirilib. Cərrahi müdaxilənin əsas məqsədi bağırsağın təbii anatomik və funksional tamlığını bərpa etmək, pasiyentin həyat keyfiyyətini yüksəltmək və stomanın ləğvinə nail olmaq olub.

 

T.Əmirov bildirib ki, son illərdə yoğun və düz bağırsaq xəstəliklərinin rastgəlmə tezliyi nəzərəçarpacaq dərəcədə artıb. Bu artımın əsas səbəbləri sırasında qeyri-sağlam qidalanma, oturaq həyat tərzi, piylənmə, siqaret istifadəsi və digər risk faktorları dayanır. Əvvəllər daha çox 45–70 yaş arasında rast gəlinən bu patologiyalar son illərdə 20–30 yaşlı gənc pasiyentlər arasında da daha tez-tez müşahidə olunur. Bu səbəbdən erkən diaqnostika, vaxtında müayinə və profilaktik skrininqlərin aparılması xüsusi əhəmiyyət kəsb edir.

 

Həkim qeyd edib ki, yoğun və düz bağırsaq nahiyəsində aparılan rekonstruktiv əməliyyatlar yüksək dəqiqlik tələb edən mürəkkəb cərrahi müdaxilələr sırasındadır.

 

Əməliyyatın təhlükəsiz və uğurla başa çatdırılmasında anestezioloji təminat mühüm rol oynayıb. Xəstənin əməliyyatöncəsi vəziyyəti ətraflı qiymətləndirilib və ATU-nun Tədris Cərrahiyyə Klinikasının Anesteziologiya və reanimatologiya şöbəsinin müdiri Məmməd Abbasov tərəfindən fərdi şəkildə planlaşdırılıb.