Böyrəklərimiz orqanizmdə yığılan zərərli maddələri və artıq mayeni süzərək bədəndən xaric edir. Lakin böyrəklər bu funksiyanı yerinə yetirə bilmədikdə, dializ müalicəsinə ehtiyac yaranır.

Bu barədə Aztibb.az-a Şəmkir Rayon Mərkəzi Xəstəxanasının Hemodializ şöbəsinin həkimi Roza Orucova məlumat verib.

Həkim bildirib ki, dializ – böyrəklərin fəaliyyətini əvəz edən, qandakı tullantıları və artıq mayeni təmizləyən müalicə üsuludur. Bu müalicə əsasən xroniki və ya kəskin böyrək çatışmazlığı olan xəstələrə tətbiq edilir.

Roza Orucova qeyd edib ki, dializ müalicəsinin növləri aşağıdakılardır:

Hemodializ – Qan xüsusi dializ aparatı vasitəsilə təmizlənərək yenidən orqanizmə qaytarılır. Müalicə həkimin təyin etdiyi qrafik üzrə seanslar şəklində aparılır.
Peritoneal dializ – Qarın boşluğuna yerləşdirilən kateter vasitəsilə xüsusi dializ məhlulu istifadə olunur və tullantı maddələr qarın pərdəsi vasitəsilə orqanizmdən uzaqlaşdırılır.

O, dializin kimlərə tətbiq olunduğu barədə də danışıb. Bildirib ki, dializ xroniki böyrək çatışmazlığı olan şəxslərə, kəskin böyrək çatışmazlığı olan xəstələrə, böyrək funksiyası ciddi şəkildə zəiflədikdə, qanda kaliumun təhlükəli səviyyədə yüksəlməsi (hiperkalemiya) zamanı, orqanizmdə artıq maye və toksinlərin yığılması (uremiya) hallarında tətbiq olunur.

"Dializ müalicəsi böyrək çatışmazlığı olan xəstələrin həyat keyfiyyətinin yaxşılaşdırılmasına, sağlamlıqlarının qorunmasına və bəzi hallarda böyrək transplantasiyasına qədər həyatın davam etdirilməsinə mühüm töhfə verir", - deyə həkim əlavə edib.