Son günlər sosial şəbəkələrdə Bakıda "qulaqdibi" (epidemik parotit) xəstəliyinin kütləvi yayıldığı barədə gəzən şayiələrə Səhiyyə Nazirliyindən rəsmi reaksiya gəlib. Nazirlik bu iddiaların tamamilə əsassız olduğunu, ölkədə epidemioloji vəziyyətin sabit saxlanıldığını və yalnız tək-tük (sporadik) halların qeydə alındığını bəyan edib.

Aztibb.az xəbər verir ki, qurumun məlumatına görə, xəstəlik daha çox peyvənd olunmamış şəxslər arasında hava-damcı yolu ilə yayılır. Əsas əlamətləri bədən hərarətinin yüksəlməsi, qulaqətrafı tüpürcək vəzilərində şişkinlik, ağrı və ümumi halsızlıqdır. Xəstəlik əksər hallarda yüngül keçsə də, peyvənd olunmamış yeniyetmə və böyüklərdə nadir hallarda ağırlaşmalara yol aça bilər.

Səhiyyə Nazirliyi bəyan edir ki, xəstəlikdən qorunmağın ən etibarlı yolu Milli Peyvənd Təqviminə uyğun olaraq uşaqlara 12 aylığında və 6 yaşında vurulan QPM (qızılca, parotit, məxmərək) peyvəndidir. Valideynlərə övladlarının peyvənd statusunu yoxlamaq, buraxılmış dozalar varsa, sahə həkiminə müraciət etmək tövsiyə olunur.

Həmçinin qeyd olunub ki, infeksiyadan qorunmaq üçün şəxsi gigiyenaya əməl edilməli, qapalı məkanlar tez-tez havalandırılmalı və simptomlar müşahidə edildikdə özünümüalicədən qaçıb həkimə müraciət olunmalıdır. Nazirlik vətəndaşları sosial şəbəkələrdəki təsdiqlənməmiş məlumatlara inanmamağa və yalnız rəsmi mənbələrə istinad etməyə çağırıb.