ATU-nun Tədris Cərrahiyyə Klinikasında burunətrafı ciblərin patologiyalarının müalicəsi məqsədilə endoskopik makselyar sinus antrostomiyası uğurla icra olunub.
Bu barədə Aztibb.az-a Klinikadan bildirilib.
Əməliyyat Tədris Cərrahiyyə Klinikasının Qulaq, burun, boğaz xəstəlikləri kafedrasının dosenti Ayaz Qasımov və Ağız, üz və çənə cərrahiyyəsi kafedrasının assistenti Bilal Əliyev tərəfindən icra olunub.
Makselyar sinus antrostomiyası burunətrafı ciblərin xəstəlikləri zamanı tətbiq olunan cərrahi müdaxilədir. Əməliyyatın məqsədi makselyar sinusun təbii drenajını və ventilyasiyasını bərpa etmək, sinus daxilində toplanmış iltihabi möhtəviyyatı və patoloji toxumaları xaric etməkdir. Bu üsul xüsusilə konservativ müalicəyə tabe olmayan xroniki sinusitlər, sinus kistaları, göbələk mənşəli zədələnmələr və digər patologiyalar zamanı effektiv nəticə verir.
