Endometrioz reproduktiv yaşda olan qadınlarda geniş yayılmış ginekoloji xəstəlikdir və təbii yolla hamilə qalma ehtimalını azalda bilər. Bu barədə ginekoloq Yekaterina Lisovskaya məlumat verib.

Aztibb.az "İzvestiya" nəşrinə istinaən yazır ki, həkimin sözlərinə görə, endometrioz zamanı uşaqlığın daxili qişasını təşkil edən hüceyrələr uşaqlıqdan kənarda inkişaf edir. Bu isə iltihab, ağrı və bitişmələrin yaranmasına səbəb olur. Xəstəlik nəticəsində uşaqlıq borularının keçiriciliyi pozula, yumurtalıqların funksiyası zəifləyə və embrionun uşaqlığa implantasiyası çətinləşə bilər.

Mütəxəssis qeyd edib ki, aybaşı zamanı güclü ağrılar, cinsi əlaqə və ya tualet zamanı ağrı endometriozun əlaməti ola bilər və belə hallarda ginekoloqa müraciət etmək vacibdir.

Lisovskaya vurğulayıb ki, endometrioz sonsuzluq demək deyil. Müasir müalicə üsulları, xüsusilə laparoskopiya, endometrioz ocaqlarını və bitişmələri aradan qaldıraraq reproduktiv funksiyanın bərpasına kömək edir və bir çox qadında təbii yolla hamilə qalmaq şansını artırır.

Həkim sonda xatırladıb ki, endometrioz uzun müddət simptomsuz keçə bilər. Buna görə qadınların mütəmadi ginekoloji müayinədən keçməsi və kiçik çanaq orqanlarını yoxlatdırması tövsiyə olunur.