Böyük Britaniyanın Dərman və Səhiyyə Məhsullarını Tənzimləmə Agentliyi (MHRA) qaraciyərin piylənməsi fonunda inkişaf edən və ciddi zədələnmələrə səbəb ola bilən MASH (metabolik disfunksiya ilə əlaqəli steatohepatit) xəstəliyinin müalicəsi üçün Rezdiffra (resmetirom) preparatını rəsmi olaraq təsdiqləyib.

Aztibb.az "Everydayhealth" nəşrinə istinadən yazır ki, alkoqolla əlaqəli olmayan yağlı qaraciyər xəstəliyinin irəliləməsi nəticəsində yaranan MASH üçün hazırlanmış bu preparat xəstələr üçün mühüm müalicə alternativi hesab olunur.

Yeni qərara əsasən, Rezdiffra MASH və orta-ağır dərəcəli qaraciyər fibrozu (çapıqlaşma) diaqnozu qoyulmuş yetkin xəstələrin müalicəsi üçün Böyük Britaniyada təsdiqlənən ilk dərmandır.

Preparatın təsir mexanizmi qaraciyərdə fəaliyyət səviyyəsi azalmış THR-β reseptorunu aktivləşdirməyə əsaslanır. Bunun nəticəsində yağların parçalanması sürətlənir, qaraciyərdə yağ toplanması azalır, iltihab zəifləyir və hüceyrə zədələnməsinin bərpası dəstəklənir.

917 yetkin xəstənin iştirakı ilə 12 ay davam edən klinik tədqiqatların nəticələrinə görə, preparat qəbul edən xəstələrin təxminən 30 faizində qaraciyər fibrozunun irəliləməsi müşahidə olunmadan vəziyyətin yaxşılaşdığı müəyyən edilib.

Dərman 60 mq, 80 mq və 100 mq tablet şəklində ağızdan qəbul edilir. Klinik araşdırmalara əsasən, ən çox rast gəlinən yan təsirlər yüngül ishal və ürəkbulanma olub.

MHRA rəsmiləri bildiriblər ki, bu innovativ preparatın təsdiqlənməsi MASH xəstələrinin müalicəsində mühüm mərhələdir və onların daha effektiv terapiyaya çıxış imkanlarını genişləndirəcək.