Elm dünyası iki il öncə baş vermiş, etik müzakirələrə səbəb olan cəsarətli və qeyri-adi "özünü müalicə" hadisəsini yenidən gündəmə gətirib. Xorvatiyalı virusoloq Beata Halassy üçüncü dəfə təkrarlanan döş xərçəngi ilə mübarizədə standart müalicə üsullarının nəticə vermədiyini gördükdən sonra laboratoriyasında hazırladığı virus terapiyasını öz üzərində sınaqdan keçirmək qərarına gəlib. Onun öz bədəni üzərində apardığı bu eksperimental müalicə tibb tarixində nadir uğurlardan biri kimi qiymətləndirilir və xərçəng müalicəsində yeni perspektivlər yaradır.

Aztibb.az "Vaccines"jurnalının məluymatına istinadən yazır ki, Dr. Halassy müalicə zamanı xərçəng hüceyrələrini hədəf alan və immun sistemini aktivləşdirən onkolitik viroterapiya (OVT) metodundan istifadə edib. O, laboratoriyada hazırladığı qızılca və vezikulyar stomatit viruslarından ibarət xüsusi qarışığı birbaşa şiş nahiyəsinə yeridib. İki ay davam edən müalicə müddətində virusların stimullaşdırdığı immun cavab nəticəsində şişin nəzərəçarpacaq dərəcədə kiçildiyi, yumşaldığı və sağlam toxumadan ayrılaraq cərrahi əməliyyat üçün daha uyğun vəziyyətə gəldiyi müşahidə olunub.

Sonradan uğurlu cərrahi əməliyyat keçirən alim dörd illik müşahidə dövrünün sonunda xərçəngdən tamamilə azad olub. Bu hadisə xüsusilə müalicə imkanları məhdud olan bəzi xərçəng növlərində fərdiləşdirilmiş viroterapiyanın böyük potensiala malik olduğunu göstərir. Bununla yanaşı, bu tədqiqat yalnız tibbi nəticələri ilə deyil, elmi nəşr mərhələsində üzləşdiyi çətinliklərlə də diqqət çəkib. Belə ki, Halassynin məqaləsi "təhlükəli özünümüalicə üsullarını təşviq edə biləcəyi" narahatlığı səbəbindən bir sıra elmi jurnallar tərəfindən qəbul edilməyib.

Nəhayət, tədqiqat elmi ictimaiyyətdə etik sərhədlərlə bağlı geniş müzakirələrə səbəb olub. Mütəxəssislər əldə olunan nəticəni ümidverici hesab etsələr də, klinik nəzarət olmadan belə fərdi müdaxilələrin ciddi həyati risklər daşıdığını və heç bir halda şəxsi təşəbbüslə təkrarlanmamalı olduğunu vurğulayırlar. Dr. Halassy isə öz təcrübəsinin gələcəkdə onkolitik viroterapiya sahəsində daha geniş elmi araşdırmaların aparılmasına stimul verəcəyinə ümid etdiyini bildirib.