Türkiyənin Ərzurum şəhərində fəaliyyət göstərən Fatih Alper tərəfindən hazırlanmış əməliyyatsız və hədəfyönlü müalicə üsulu sayəsində yüzlərlə qadın xroniki süd vəzi iltihabından (qranulomatoz mastit) sağalıb.

Aztibb.az "Medimagazin"ə istinadən yazır ki, Atatürk Universiteti Tibb Fakültəsinin Radiologiya kafedrasının müdiri olan professor Alperin 2015-ci ildə hazırlamağa başladığı və 2020-ci ildə elmi ədəbiyyata daxil edilən üsulda xəstələrə ultrasəs nəzarəti altında süd vəzisinin içinə aşağı dozalı steroid inyeksiyası tətbiq edilir.

10–15 dəqiqə davam edən və orta hesabla 5 seansdan ibarət müalicə nəticəsində son 11 ildə 700 qadın əməliyyatsız və ağızdan dərman qəbul etmədən sağalıb.

Prof. Dr. Fatih Alper bildirib ki, ağızdan qəbul edilən dərmanların cəmi 1–2 faizi süd vəzisinə çatdığı halda, bu üsulda preparatın 95 faizdən çoxu birbaşa zədələnmiş toxumaya yönəlir və müalicənin effektivliyini artırır.

Onun sözlərinə görə, son illərdə lokal steroid müalicəsi dəriyə tətbiq olunan steroidlər və vitamin-mineral dəstəyi ilə birləşdirilərək daha uğurlu nəticələr əldə edilir.

Professor qeyd edib ki, bu üsul üçün Türkiyənin müxtəlif bölgələri ilə yanaşı Almaniya, Azərbaycan, Dubay və Niderlanddan da xəstələr müraciət edir. Xəstəlik əsasən 20–40 yaşlı qadınlarda rast gəlinir və süd vəzisində südün toplanması, stress və travmalar onun yaranmasına və təkrarlanmasına səbəb ola bilər.