ATU-nun Tədris Cərrahiyyə Klinikasında 13 yaşlı qız pasiyentdə ağır dərəcəli onurğa əyriliyi (skolioz) uğurla cərrahi yolla aradan qaldırılıb. Əməliyyat Tədris Cərrahiyyə Klinikasının Neyrocərrahiyyə şöbəsinin müdiri, dosent Cəmil İskəndərov tərəfindən icra olunub.

Klinikadan Aztibb.az-a bildirilib ki, pasiyentin müayinəsi zamanı onurğada 45 dərəcədən artıq skolioz aşkarlanıb. Bu yaşadək tətbiq olunan konservativ müalicə üsulları, o cümlədən korset müalicəsi istənilən nəticəni verməyib. Onurğa əyriliyinin proqressiv şəkildə artması nəzərə alınaraq cərrahi müdaxilə qərarı qəbul edilib.

Əməliyyat zamanı müasir neyromonitorinq sistemindən istifadə olunub. Bu texnologiya cərrahi müdaxilə boyunca onurğa beyni və sinir kökcüklərinin funksional vəziyyətini fasiləsiz izləməyə imkan verərək mümkün nevroloji ağırlaşmaların qarşısının alınmasına xidmət edir.

Təxminən dörd saat davam edən əməliyyat uğurla başa çatıb. Cərrahi müdaxilə nəticəsində onurğa deformasiyası əhəmiyyətli dərəcədə korreksiya olunub, xəstənin duruşunun bərpasına və estetik görünüşünün yaxşılaşdırılmasına nail olunub. Əməliyyatın əsas məqsədi yalnız kosmetik qüsuru aradan qaldırmaq deyil, həm də gələcəkdə əyriliyin proqressivləşməsinin qarşısını almaq və pasiyentin həyat keyfiyyətini yüksəltmək olub.

Dosent Cəmil İskəndərov bildirib ki, son illərdə uşaq və yeniyetmələr arasında skolioz halları daha tez-tez müşahidə olunur. Bu səbəbdən valideynlər övladlarında çiyinlər arasında hündürlük fərqi, onurğada əyrilik, kürək nahiyəsində çıxıntı və ya duruş pozğunluğu gördükdə vaxt itirmədən mütəxəssisə müraciət etməlidirlər. Erkən diaqnostika və vaxtında başlanılan müalicə bir çox hallarda xəstəliyin ağırlaşmasının və geniş cərrahi müdaxiləyə ehtiyacın qarşısını ala bilir.