Ürək-damar xəstəliklərinin riskini azaltmaq üçün ağır məşqlər və ya sərt pəhrizlər həmişə vacib deyil. Kardioloqlar bildirirlər ki, axşam saatlarında formalaşdırılan sağlam vərdişlər ürəyin fəaliyyətinə və ümumi sağlamlığa əhəmiyyətli dərəcədə müsbət təsir göstərə bilər.

Aztibb.az "EatingWell" nəşrinin məlumatına istinadən yazır ki, mütəxəssislər ürək sağlamlığını qorumaq üçün aşağıdakı dörd sadə qaydaya əməl etməyi tövsiyə edirlər.

1. Axşam yeməyini erkən yeyin

Həkimlər son yeməyi mümkün qədər saat 20:00-dan əvvəl, ən azı yatmazdan 3 saat öncə qəbul etməyi məsləhət görürlər. Araşdırmalar göstərir ki, saat 21:00-dan sonra qida qəbulu ürək-damar xəstəlikləri riskini artıra bilər. Axşam yeməyinin yüngül olması, meyvə və ya bir ovuc qoz-fındıq kimi sağlam qəlyanaltılara üstünlük verilməsi tövsiyə olunur.

2. Yeməkdən sonra qısa gəzinti edin

Axşam yeməyindən sonra 10 dəqiqəlik sakit gəzinti qan dövranını yaxşılaşdırır, qanda qlükoza səviyyəsinin tənzimlənməsinə kömək edir və orqanizmi istirahət rejiminə hazırlayır.

3. Stressi azaldan rahatlama üsullarından istifadə edin

Axşam saatlarında yığılan stress ürəyin sağlamlığına mənfi təsir göstərir. Mütəxəssislər kortizol hormonunun səviyyəsini azaltmaq və ürək ritmini sabitləşdirmək üçün dərin nəfəs məşqlərini tövsiyə edirlər. "4-7-8" və ya "qutu nəfəsi" (box breathing) kimi texnikalar orqanizmin rahatlamasına kömək edə bilər.

4. Yuxu rejiminə riayət edin

Kardioloqlar hər gün eyni saatda yatıb oyanmağın ürək sağlamlığı üçün vacib olduğunu vurğulayırlar. Araşdırmalara görə, qeyri-müntəzəm yuxu rejimi olan insanlarda infarkt və insult kimi ürək-damar ağırlaşmalarının riski daha yüksək olur.

Mütəxəssislər bildirirlər ki, bu sadə vərdişlərin gündəlik həyata daxil edilməsi uzunömürlülüyə və ürəyin sağlam qalmasına mühüm töhfə verə bilər.