Dövlət Gömrük Komitəsi Tibbi Xidmət İdarəsinin Mərkəzi Gömrük Hospitalının Mama-ginekologiya şöbəsinin rəisi, mama-ginekoloq Dr. Təranə Bayramova Böyük Britaniyanın Birmingham Women’s and Children’s NHS Foundation Trust xəstəxanasında keçirilən beynəlxalq təkmilləşmə proqramını uğurla başa vurub.

Bu barədə Aztibb.az-a Mərkəzi Gömrük Hospitalından xəbər verilib.

Bildirilib ki, Hospital ilə Britaniya-Azərbaycan Həkim və Stomatoloqlar Assosiasiyası arasında imzalanmış əməkdaşlıq memorandumu çərçivəsində təşkil olunan proqram müddətində Dr. Təranə Bayramova Böyük Britaniyanın aparıcı tibb müəssisələrində mama-ginekologiya sahəsində tətbiq olunan müasir diaqnostika, müalicə və cərrahi yanaşmalarla yaxından tanış olub.

Təcrübə proqramının həyata keçirilməsində və təşkilati məsələlərin əlaqələndirilməsində Britaniya-Azərbaycan Həkim və Stomatoloqlar Assosiasiyasının rəhbəri, Birmingham Women’s and Children’s NHS Foundation Trust xəstəxanasının mama-ginekoloqu Dr. Fidan İsrafilbəylinin dəstəyi və koordinasiyası mühüm rol oynayıb.

Proqram çərçivəsində Dr. Təranə Bayramova doğuş, erkən hamiləlik, ginekologiya, uroginekologiya, ginekoloji onkologiya, reproduktiv tibb, təcili yardım və elmi-tədqiqat bölmələrinin fəaliyyəti ilə yaxından tanış olub, müxtəlif cərrahi əməliyyatları müşahidə edərək beynəlxalq klinik protokollar, innovativ tibbi texnologiyalar, multidissiplinar əməkdaşlıq modeli və pasiyent təhlükəsizliyi sahəsində qabaqcıl təcrübələri mənimsəyib.

Səfər çərçivəsində Böyük Britaniyanın nüfuzlu ali təhsil müəssisələrindən olan Birmingham Universitetinin Tibb Fakültəsi, eləcə də ölkənin aparıcı çoxprofilli tibb müəssisələrindən biri olan Queen Elizabeth Hospital Birmingham ziyarət edilib. Görüşlər zamanı tibbi təhsil, elmi-tədqiqat fəaliyyəti, klinik idarəetmə və gələcək əməkdaşlıq imkanları ətrafında faydalı fikir mübadiləsi aparılıb.

Dr. Təranə Bayramovanın əldə etdiyi bilik və praktiki təcrübənin Mərkəzi Gömrük Hospitalında tətbiqi pasiyentlərə göstərilən tibbi xidmətin daha da təkmilləşdirilməsinə, eyni zamanda Mərkəzi Gömrük Hospitalı ilə Britaniya-Azərbaycan Həkim və Stomatoloqlar Assosiasiyası arasında beynəlxalq əməkdaşlığın gələcək inkişafına yeni imkanlar açacaq.