Beyləqan rayon l Şahsevən Ailə Sağlamlıq Mərkəzi və Dünyamalılar Ailə Sağlamlıq Mərkəzinin tibb işçiləri tərəfindən hamilə qadınların sağlamlığının qorunması məqsədilə patronaj xidmətləri həyata keçirilir.
Bu barədə Aztibb.az-a Beyləqan RMX-dan xəbər verilib.
I Şahsevən Ailə Sağlamlıq Mərkəzi və Dünyamalılar Ailə Sağlamlıq Mərkəzinin mama heyəti tərəfindən hamilə qadınların sağlamlığının qorunması və hamiləliyin normal gedişinin təmin olunması məqsədilə mütəmadi patronaj xidmətləri həyata keçirilir.
Patronaj zamanı hamilə qadınlar yaşadıqları ünvanda ziyarət edilir, onların ümumi sağlamlıq vəziyyəti qiymətləndirilir, hamiləliyin gedişi izlənilir, qan təzyiqi və digər vacib göstəricilər yoxlanılır. Eyni zamanda, hamilə qadınlara həkim təyinatlarına və müayinələrə vaxtında müraciət etməyin əhəmiyyəti izah olunur, qəbul etdikləri dərman vasitələri və vitamin preparatları barədə tövsiyələr verilir.
Bununla yanaşı, gələcək analar sağlam və balanslı qidalanma, fiziki aktivlik, şəxsi gigiyena qaydaları, zərərli vərdişlərdən uzaq durma, hamiləlik zamanı yarana biləcək risk əlamətləri və doğuşa hazırlıq mövzularında geniş şəkildə maarifləndirilirlər.
Həyata keçirilən patronaj xidmətlərinin əsas məqsədi ana və körpə sağlamlığının qorunması, hamiləlik dövründə yarana biləcək risklərin vaxtında aşkar olunaraq qarşısının alınması, həmçinin hamilə qadınların tibbi nəzarətdə saxlanılması və onların maarifləndirilməsi istiqamətində tədbirlərin gücləndirilməsidir.
