38 həftəlik hamiləlikdən 2430 qram çəki ilə özəl tibb müəssisəsində dünyaya gələn yenidoğulmuş doğulduqdan dərhal sonra Səhiyyə Nazirliyinin K.Y.Fərəcova adına Elmi-Tədqiqat Pediatriya İnstitutunun Yenidoğulmuşların reanimasiya və intensiv terapiya şöbəsinə təxliyə olunub.

İnstitutdan Aztibb.az-a verilən məlumata görə, aparılan müayinələr nəticəsində körpədə qida borusunun atreziyası və distal traxeoezofageal fistul aşkarlanıb. Təcili tibbi göstəriş əsasında pasiyentə sağ tərəfli torakotomiya, distal traxeoezofageal fistulun ləğvi və ezofaqoezofaqostomiya əməliyyatı icra edilib.

Əməliyyat uşaq cərrahı Umud Musayev tərəfindən həyata keçirilib. Cərrahi briqadanın tərkibində assistent Zülfiyyə Məmmədova və anestezioloq Nailə Səlimova da iştirak ediblər.
Əməliyyatdan sonrakı dövrdə körpə Yenidoğulmuşların reanimasiya və intensiv terapiya şöbəsində şöbə müdiri Xuraman Məmmədovanın rəhbərliyi altında reanimatoloq Sevinc Nəbiyevanın nəzarəti ilə intensiv müalicə alıb.

Aparılan nəzarət kontrast müayinəsi zamanı anastomoz nahiyəsində sızma qeydə alınmayıb. 29 iyun 2026-cı il tarixində körpə Uşaq Cərrahiyyəsi şöbəsinə köçürülüb. Hazırda tam enteral qidalanır, qusması yoxdur, ümumi vəziyyəti isə qənaətbəxş qiymətləndirilir.

Körpənin valideynləri övladlarının sağlamlığına qovuşmasında əməyi olan bütün həkimlərə və tibb personalına dərin minnətdarlıqlarını bildirərək, göstərilən peşəkar tibbi yardım, yüksək diqqət və qayğıya görə təşəkkürlərini ifadə ediblər.