Azərbaycan Tibb Universitetinin Tədris Cərrahiyyə Klinikasında uzun illər xroniki qəbizlikdən əziyyət çəkən pasiyent üzərində mürəkkəb təkrar cərrahi əməliyyat uğurla icra edilib.
Klinikadan Aztibb.az-a bildirilib ki, əməliyyatı klinikanın ümumi cərrahı, professor Rüstəm Məmmədov həyata keçirib.
Pasiyent 20 il əvvəl başqa bir xəstəxanda dolixosiqma (yoğun bağırsağın siqmoid hissəsinin həddindən artıq uzanması) və kolonoptoz (yoğun bağırsağın sallanması) diaqnozları ilə əməliyyat olunub. Lakin əməliyyatdan bir müddət sonra yenidən qəbizlik və digər həzm problemləri yaranıb. O vaxtdan etibarən pasiyent yalnız işlədici dərmanların köməyi ilə bağırsaq fəaliyyətini təmin edə bilib. Maraqlıdır ki, pasiyentin özü də həkimdir.
Son dövrlərdə pasiyentdə qida qəbulundan dərhal sonra qarında güclü köp, şişkinlik və narahatlıq yaranıb. Tədris Cərrahiyyə Klinikasında aparılan ətraflı müayinələrdən sonra təkrar cərrahi müdaxilə qərarı verilib. Əməliyyat zamanı yoğun bağırsağın funksiyasını itirmiş və həddindən artıq uzanmış hissəsi rezeksiya olunub. Daha sonra xüsusi cərrahi modifikasiya tətbiq edilərək nazik bağırsaq yoğun bağırsağın sağlam qalan hissəsinə birləşdirilib. Məqsəd bağırsaq keçidini bərpa etmək və uzun illər fəaliyyəti zəifləmiş bağırsağın funksiyasını mümkün qədər normallaşdırmaq olub.
Professor R.Məmmədovun sözlərinə görə, bu tip əməliyyatlar hər bir pasiyent üçün fərdi planlaşdırılır. Bəzi hallarda bağırsaq funksiyası tam bərpa olunmasa da, əməliyyatdan sonra pasiyentlərin əksəriyyətində qəbizlik əhəmiyyətli dərəcədə azalır, işlədici preparatlardan asılılıq minimuma enir və həyat keyfiyyəti nəzərəçarpacaq dərəcədə yaxşılaşır.
Mütəxəssis bildirib ki, dolixosiqma əsasən anadangəlmə inkişaf qüsurudur və xüsusilə uşaqlıq yaşlarında daha çox rast gəlinir. Erkən yaşlarda bağırsaqların daha aktiv işləməsi səbəbindən problem uzun müddət gizli qala bilər. Yaş artdıqca bağırsağın hərəkətliliyi zəifləyir və xroniki qəbizlik inkişaf edir.
