Tədris Cərrahiyyə Klinikasının Uşaq cərrahiyyəsi şöbəsində yalancı kriptorxizm diaqnozu qoyulan uşağa uğurlu cərrahi müdaxilə həyata keçirilib.

Uşaq cərrahiyyəsi şöbəsinin müdiri Hikmət Alışanov Aztibb.az-a bildirib ki, kriptorxizm – xayanın xayalıqda olmaması patologiyası müxtəlif formalarda rast gəlinir. Əməliyyat olunan pasiyent həqiqi deyil, yalancı kriptorxizm formasına aid olub. Həkim bildirib ki, yalancı kriptorxizmin də bir neçə növü mövcuddur və onların bəzilərində cərrahi müdaxilə zəruri hesab edilir.

Qeyd olunub ki, bəzi hallarda xaya gün ərzində vaxtının böyük hissəsini qasıq kanalında keçirir. Bu isə bədən temperaturunun təsiri nəticəsində xayanın inkişafdan qalmasına, gələcəkdə isə funksional problemlərin yaranmasına səbəb ola bilər.

Məhz bu risklərin qarşısını almaq məqsədilə pasiyentə Bianchi üsulu ilə xayanın xayalığa endirilməsi və fiksasiyası (orxiopeksiya) əməliyyatı icra olunub. Əməliyyatın əsas məqsədi xayanın normal inkişafını, funksiyasını və gələcək reproduktiv qabiliyyətini qorumaqdır.

Hikmət Alışanov valideynlərə və pediatr həmkarlarına müraciət edərək vurğulayıb ki, həqiqi və yalancı kriptorxizm formalarının düzgün differensial diaqnostikası böyük əhəmiyyət daşıyır. Onun sözlərinə görə, retraktil xaya hallarında adətən cərrahi müdaxiləyə ehtiyac olmur. Lakin yalancı kriptorxizmin digər növlərində əməliyyat tələb oluna bilər.